Sha kamra u Myntri ïalam u MLA ïa ki nongïalam shnong halor ki jingïarap lyngshop mariang

Shillong, Ïaiong 06 : U MLA jong ka Nongpoh Bah Mayralborn Syiem ha ka sngi Nyngkong u la ïalam ia ki nongïalam shnong na ka thaiñ ban kynduh ïa u Myntri ka tnad Revenue and Disaster Managment, Bah Lahkmen Rymbui na ka bynta ban ban ïa kren halor ki song jingïarap na ka bynta ki lanot kiba shah ktah ha ki bor jong ka mariang.
Ha ka jingïakren bad ki lad pathai khubor, u Bah Mayralborn u la ïathuh ba ha ka jingkynduh ki la pyntip ïa u Myntri halor ki jingeh ba ki nongrep ki kynduh na ka jingshah lyngshop ha ki bor mariang la ka long ha ka lyer, u phria bad kiwei kiwei ki bor ka mariang.
“Nalor ka jingeh jong ki nongrep ngi la ïoh ruh ban ïa kren ïa kiwei pat ki jingeh kiba ïadei bad ki lad jingïarap na ka bynta ki longiing kiba shah ktah ha ka jinglyngshop ka mariang ha ki artaiew ba la dep kaba la wanrah ka jingduh kaba khraw ïa ki nongshong shnong,” ong u MLA.
Shuh shuh u la ïathuh ba u Myntri u la pdiang ïa ka jingai jingmut jong ki ba ka sorkar jylla lyngba ka State Disaster Management Authority (SDMA) ba kin pynstet ban pyllait ïa ka song jingïarap pisa sha ka District Disaster Management Authority (DDMA) khnang ba ki bor distrik kin lah ban pyllait kloi ïa ki jingïarap sha ki nongrep ba shah ktah bad kumjuh sha ki longiing ba shah lyngshop ha ki bor ka mariang.
“Namar kine ki jingjia ki ju jia naduh bnai Lber, Ïaiong, Jymmang ter ter khamtam ha ka thain Ri Bhoi jongngi, ki ju don ki mar rep kiba la duh noh bad ki longiing kiba shah khyllied ki tnum bad kumta ter ter bad shiteng miet ki hap ban phet rieh. Ïa kum kito mar mar dei ban pynpoi ïa ki jingïarap,” u la ong da kaba bynrap
ba watla baroh shi katta ki don ki jingïarap hynrei katei ka jingïakren ka long ban kyntu ba dei ban ai da ki kynja tin sop iing ne ki tyrpa kum ka jingïarap kaba mardor haba don kum kitei ki jingjia kynsan kynsan.
U Bah Mayral u la ong ruh ba ka sorkar ka dei ban mang kham bun ka pisa sha ki distrik khnang ba ka DDMA kan lah ban pynstet bad pynkloi ïa ki jingïarap sha kito kiba shah ktah.
Une u nongmihkhmat u ong ba ka jingkwah jong ki ka long ba kine ki song jingïarap ki dei ban poi noh kham kloi na ka bynta ka jingmyntoi jong ki paidbah kiba shah ktah ha kum kine ki jingjia kiba shu jia kynsan kynsan ha ka por bym poi pyrkhat.