Sha ka UDP leit pynïasoh ki hajar ki nongkyrshan na kiwei pat ki party, pdiang burom u Bah Metbah Lyngdoh

Mawkyrwat, Jylliew, 26: Ka jingpynkhreh na ka bynta ka jingjied ïa ki nongmihkhmat sha ka Ïingdorbar Thaw-aiñ ka ban sa long u snem 2023 ka la nangïaid shakhmat ha kaba ka jingïarung ïa mih jong ki nongkyrshan jong ki party bapher bapher ka jur bha bad mynta ka sngi 25 tarik u Jylliew, 2022 la sakhi ruh ba ka United Democratic Party (UDP) jong ka Mawkyrwat Circle ka pdiang sngewbha ïa ki hajar ki nongkyrshan jong kiwei pat ki party ban long ki nongkyrshan ba pura jong ka.
Ïa kane ka jingïalang ban pdiang burom na ka bynta ban pynïasoh ïa kiwei pat ki nongkyrshan sha ka party UDP la pynlong ha madan jong ka Balang Presbyterian Mawkyrwat kaba don hajan ka Community Hall, Mawkyrwat ha ryngkat ka jingïadonlang jong ki nongïalang ba hakhmat eh jong ka United Democratic Party (UDP) na Central Body.
Ha kane ka sngi la ïoh ban kren pdiang burom ïa ki nongkyrshan jong kiwei pat ki party da u bah Pius Marweiñ, President jong ka UDP South West Khasi Hills District uba long ruh kum u MLA/MDC jong ka Ranikor Constituency kata ïa kiba la wan ban pynïasoh na ka party Indian National Congress (INC), na ka People Democratic Front (PDF), na ka Bharat Janata Party (BJP), na ka National People Party (NPP) bad kumjuh ruh na ka Hills State People’s Democratic Party (HSPDP) bad bud sa ka jingkren lyngkot na ka kong Shidalin Marngar INC, bah Siril Wahlang, PDF, bah Poland Sohphoh BJP, bah Phroly Lyngkhoi NPP, bah Edilbert Iawphniaw INC, bah Treling Marweiñ HSPDP bad na ka bynta kine la ïoh ban pynskhem da u bah Metbah Lyngdoh, President ka UDP Central Body, uba long ruh kum u Speaker jong ka Meghalaya Legislative Assembly.
U Bah Metbah Lyngdoh, President ka UDP Central Body, uba long ruh kum u Speaker jong ka Meghalaya Legislative Assembly haba kren ha ka jingïalang ban pdiang burom na ka bynta ka jingwan pynïasoh jong kiwei pat ki party sha ka United Democratic Party ha Mawkyrwat Constituency u la ong ba um pat ju lap ba u paidbah ba bun un wan ban sngap ha kum kine ki jingïalang namar ka elekshon ka dang jngai bah. “Kane ka long kaei kaei kaba phylla bad kaba don ka dak jong ka jingkyrmen lyngba ka jingïalang jong U Blei najrong”, ong u bah Metbah.
Ha ka jingkren jong u u la pdiang sngewbha kyrpang ruh na ka bynta kito ki nongkyrshan jong kiwei pat ki party kata na ka HSPDP, NPP, PDF, BJP, bad na ka Congress kiba la wan ban rung kum ki dkhot ba pura jong ka party UDP da ka jingthmu ban pynkhlaiñ na ka bynta ka jingjied ïa u nongmihkhmat ha u snem 2023. U la pynpaw ka jingsngewkmen ha kaba ula ïohi da la ki jong ki khmat ba ki hajar ki nongkyrshan ki la wan ban pynïasoh ïa lade ha kane ka party ka bom ha kaba da ka jingwan pynïasoh jong ki kan long ka jingaimynsiem na ka bynta ki nongïalam jong ki Circle, ka District bad kumjuh ruh wat ïa ka Central Body namar dei da ka jingtrei shitom jong ki ban pynurlong ba kane sngi ban pdiang burom ka la long ka prokram kaba jop.
U la pynkynmaw ruh khyndiat ïa ka jingïaid lynti jong ka United Democratic Party (UDP) kaba la pynkha na ka Hills People Union (HPU) kaba long da ka jingthmu ban lum ban lang ïa ki seng Riewlum ban pynlong kawei. Katba ka HPU pat ka mih na ka All Party Hill Leaders Conference (APHLC) ha kaba ki don ka thong ban pynïatylli ïa ki nongïalam baroh. Namarkata, da kane ka pynphalang ruh ha kane ka party UDP mynta ba ka don ka jingpyrshang ban lum ban lang ïa ki nongïalam ban wan pynïasohlang ha kawei ka shatri khnang ba yn lah ban wanrah ïa ki jingkylla kiba bun lada don tang kawei ka kynhun.
U la ong ruh ba khlem lah ban klet ba ka party UDP ha Mawkyrwat Constituency ha kine ki snem kiba la leit ka long ka party kaba khlaiñ bha haba phai ha ka por ba dang don u (Late) bah B.B. Nongsiej uba la long teng kum MLA/MDC barim jong ka Mawkyrwat Constituency na ka party UDP ha kaba bun ki kam u la pyntyllun bad long ruh u nongprat lynti ha ki phew snem ba la dep. Kumta ruh ha kane ka kynti ba mynta lyngba ka jingwan pynïasoh jong kiwei pat ki nongkyrshan kan long ka jingkyrmen ïa ka party na ka bynta ka elekshon ka ban sa wan ka ban long ha u snem 2023 ba ka party UDP kan ïoh ka jingjop bad ban poi sha kata ka thong ka donkam pat ïa ka jingïatreilang, jingtrei shitom bad jingïalong kawei kum shi ïing.
Namarkata, u la ong ba kum ka party kaba i don jingkyrmen ban jop suk bad ban ïoh ruh shibun ki MLA napoh ka Ri Khasi Jaiñtia kane ka paw shai ba katba pynlong ka jingïalang kiba wan ban ai jingkyrshan ïa ka party UDP ki la sdang ban mih watla hapoh jong ka jylla Meghalaya namar hangne ngi don lai tylli ki jaidbynriew kiba shong basah ki Khasi, Jaiñtia bad u Garo ha kaba kine ki donkam ban ïalong kawei ban wanrah ka jingkylla ha ka shynshar khadar hapoh ka jylla hi baroh kawei.
Ha kaba ïa dei bad ka jingrai na ka bynta uno uno u kyrtong, u bah President ba Rangbah jong ka Party UDP u la ong ba um ki nongïalam kim lah ban rai kano kano ka rai hynrei ki hap ban sngap ïa ka sur jong u paidbah kiba long ki nongkyshan kumba ka long mynta hangne Mawkyrwat Constituency namar kathaduh mynta ka pynpaw shai ba kum ka party kam pat don uno uno u kyrtong hynrei ki nongïalam jong ka Central Body ki dang ap ïa ka jingwanrah kyrteng jong ki nongïalam ha ki Circle la ka long ha Mawkyrwat, Mawsynram ne kiwei kiwei ki Constituency. “Watla ka elekshon ka dang jngai bha ka dang don mynta sa kumba 7 bnai ei ei hynrei kane ka pynpaw shai ba ki paidbah hi ki sngewthuh ba ki don ka jingshaniah ïa ka UDP”, ong u bah Metbah namar kum kine ki rynsan ki hap ban bishar bha ha kaba kane kam dei ka kam tamasa hynrei ka dei ka kam ïap kam im jong u paidbah ka dong ka thaiñ bad ka jylla hi baroh kawei.
Kumta u la kyntu ïa ki nongkitkam jong ki Primary Unit, ki Circle kiba hapoh jong ka Makyrwat Constituency ba lada don kano kano ka jingeh kim dei ban shu sngap hynrei kin pyntip ha ki bor ba hajrong namar ki kloi ban ai jingmut bad ïarap lem ha kino kino ki bynta.
Kiwei pat ki nongkren ha kane ka sngi ki long u bah Allantry F. Dkhar, Vice President ka UDP Central Body, bah Paul Lyngdoh, MDC bad Working President jong ka UDP Central Body bad u bah H. Brolding Nongsiej, MLA Mawthad-raishan Constituency uba bat mynta kum u Myntri Sorkar jong ka tnad Water Resources.
Ïa ka jingïalang la pynïaid da u bah Pius Marweiñ, MLA/MDC jong ka Ranikor Constituency uba dei ruh kum u President jong ka UDP South West Khasi Hills District.