Shillong, Ïaïong 29: U Bah Sanbor Shullai myntri ka tnad Arts and Culture jong ka jylla uba dei ruh u MLA ka BJP na Shillong South ha ryngkat ka BJP Mahila Morcha bala ïalam da ka Kong Arena Hynniewta ha ka 25 tarik Ïaïong 2022, kala pynkup borum, kitbok kitrwiang bad ïarap ïa ka Kong Darisuk Kharwanlang da ka song pisa kaba laiphew lak tyngka na bynta ka jingleit ïashim bynta jong ka sha ka 2nd KGMF National Athlete Championship ha ka kyrdan ïakop kaba 35 haduh 80 snem ha nongbah Delhi.
Ka Kong Darisuk Kharwanlang kaba don 48 snem ka don phra ngut ki khun kan ïashim bynta ha katei ka lympung kaban sdang naduh ka 30 tarik u Ïaïong haduh ka 3 tarik u Jymmang, 2022 ha nongbah Delhi. Kadei kaba ieit bha ïa ka kam ïalehkai sports bad kala khur shibun ki khusnam bad wanrah nam bad burom ïala ka jong ka jylla. Na ka liang u Bah Sanbor Shullai u la kular ban pynsngew ïa ka kyrteng jong ka sha ka sorkar khnang ban ai ki jingïarap ha ka jingbteng ka jong ka ban ïashim bynta ha ki lympung ïalehkai.
Ka Kong Arena Hynñiewta kala pynpaw ba ki don shibun ki nongïalehkai ka jylla kiba don ka sap bad kiba wan ruh na ki longïing kiba duk kumta donkam ban ïoh ka jingkyrshan na ka liang ka sorkar khnang ba kin nang lah ban ïalehkai bad ban wanrah ïa ka nam bad burom ym tang ïa ki shimet hynrei ïa ka jylla, ka ri bad ka jaidbynriew hi baroh kawei.
Ka jylla ka don shibun ki riew donsap ha ka liang ka jingïalehkai bad lada ki ïoh ka jingkyrshan kaba pura khamtam na ka sorkar ym lah ban leh ba kin mih shibun kiban mihkhmat na bynta la ka ri sha ki lympung ïalehkai International.
