Sha ka Sorkar Pdeng pyntip ka sorkar jylla ba wan thombor ki runar na Bangladesh ha SWKH, dang tohkit ïa ki ID ba ïoh kurup

Shillong, Nailar 13 : U Myntri Rangbah ka Jylla Conrad K Sangma ha ka sngi Balang u la pyntip ba na ka liang ka sorkar jylla ki la dep ban pyntip sha ka sorkar pdeng haba ïadei bad ka jingwan thombor ki runar ha ki shnong ba don ha khappud jong ka South West Khasi Hills dang shen kaba la wanrah ruh ïa ka jingsyier kaba khraw jong ki nongshong shnong kiba don ha katei ka thaiñ.
Haba kren bad katto katne ki lad pathai khubor, u Myntri Rangbah u la ong, “Katkum ki jingtip ba ngi dang ïoh lum kine ki briew ki dei tang ka kynhun jong ki runar hynrei watla katta ngi dang tohkit ban lap bad tihbniah shuh shuh halor kane ka jingjia.”
Nangta, u ong ruh ba ka jinglap ïa ki ID Card ka la pynlong ruh ïa ki ban pyntikna bad bishar bniah halor kane ka bynta.
U Myntri Rangbah u la ong ruh ba mynta ki la dep ban kem ïa jan baroh hi ki runar kiba donkti ha katei ka kam wan thombor ha ka jylla bad ong ruh ba ka sorkar ka la nang pynjur shuh shuh ïa ki bor pahara ha katei ka thain ban pyntikna ïa ka jingshong shngaiñ jong ki paidbah.
Shuh shuh u la pyntip ba katkum ki jingtip ba ki la ïoh haduh mynta, ki don kumba 7-8 ngut ki runar kiba wan leh ïa kitei ki kam runar ha khappud hynrei bun na kine la kem lut bad kiba sah sa tang 1-2 ngut ei ei.
“Ngin ïai bteng ban buddien bad peitngor ïa ka jingshong shngaiñ jong ki paidbah ha katei ka jaka khnang ba kum kine ki jingjia kin ym jia biang hadien habud,” u la ong da kaba bynrap ba lehse kine kim dei satia ki kynhun kiba thmu khnang ban leh ïa ki kam pyntriem. Watla katta u ong pat ba kum ka jylla kin ym khein sting ïa kane ka kam.
Halor ka jingkylli, u Myntri Rangbah u la ïathuh ba hadien kane ka jingjia na ka liang ka sorkar ka la pyntip sha ka Ministry of Home Affairs (MHA) bad sha ka Tnad Intelligence Bureau (IB) bad kumta ka sorkar pdeng ruh ka la dep tip halor kane.
Katkum ka jingïathuh jong u Myntri Rangbah, la ong ba kine ki runar ki la phet ruma kat shaba lap bad kumta ki poi kylleng kylleng bad kim lap lynti shuh bad dei na kane ka daw la ïoh ban kem ïa bun na ki.