Shillong, Nailur 25 : Ka jingïakhih jong ki nonghikai hapoh ka lama jong ka Federation of All School Teachers of Meghalaya (FASTOM) ka la poi sha ka sngi kaba saw ha ka sngi Palei tangba na ka lïang ki nongïalam ki la rai ba kin ïai bteng biang katba ka sorkar kam pat ai jubab halor ka mat jing dawa jong ki ban kyntiew kyrdan noh ïa ki skul Adhoc sha ka Deficit System.
Ïa kane ka rai ka kynhun ka la shim hadien ba ka Synjuk ka la dep ban kynduh ïa u Myntri ka tnad Pule Puthi ka sorkar jylla Bah Lahkmen Rymbui uba la pyntip ba ka sorkar ka hap ban bishar bniah bha shwa ïa ki jingai jingmut kiba pher bapher halor ka jingtyrwa ban pynlong ryntih lut ïa ki kyrdan jong ki skul ha ka jylla ha shwa ba kin shim ïa ka rai.
Kumta, halor kane haba kren bad ki lad pathai khubor, u Vice President jong ka FASTOM, Bah S Jungai u la ong ba ka jingtyrwa na ka bynta ka Meghalaya Education Grant (MEG) ka dang don ha ka bynta kaba dang ha trai eh bad kumta ki nonghikai skul Adhoc kim sngew tikna ïa ka jingpyntreikam.
“Kumta, kum ki nonghikai adhoc, ngim tip shisha la yn pyntreikam ne em ha kaba kut jong ka sngi. Kumta, ngin pynneh beit ka jingdawa ban kyntiew kyrdan ïa ki skul adhoc sha ka deficit system lane ka deficit pattern,” u la bynrap biang.
Une u nonghikai u la pynpaw ruh ïa ka jingbynniaw halor ka jingkuman jong ka sorkar watla ki la dep phah haduh hynriew ka jingpynkynmaw sha ka ophis treikam jong u Myntri Rangbah ka Jylla.
“Ngin ïai bteng ïa kane tad haduh ba u Myntri Rangbah un jubab ïa ka jingdawa jongngi,” u la ong.
Ha kajuh ka por u la ong ruh ba man ka por ka sorkar ka ju ai daw beit ba dei ka jingtyrkhong haba ïa kren halor ka jingdawa jong ki nonghikai Adhoc.
“Tangba, tang kawei ngi tip ba lada ka sorkar ka don ïa ka mon kaba skhem, ngam tharai ba kan don kano kano ka jingeh,” u la bynrap biang.
Shuh shuh haba jubab halor ka jingkylli, une u nonghikai u la ïathuh ba ïa mynta ki dang ap beit ïa ka jubab da ka jingthoh kaban kular halor katei ka jingdawa jong ki.
