Shillong, Nailar, 17: U Vice Chancellor jong ka skulbah North Eastern Hills University (NEHU), u Prof Prabha Shankar Shukla ha ka sngi Balang u la pyntip ba ka skulbah kan sa phah ïa ka jingtyrwa sha ka Ministry of Education, ka Sorkar India ba kan ai jingithuh ïa ki nongtrei Casual ka Univerity kum ki nongtrei bapura.
Ha ka jingïakren bad ki lad pathai khubor u Prof. Shukla u la ong ba ka shong ha ka Ministry of Education ban shim ïa ka rai halor ka jingdawa ban ithuh noh kum ki nongtrei bapura ïa ki nongtrei Casual naba ka University hi kam lah satia ban shim rai da lade halor kane ka jingdawa.
Kum ban shu pyntip, ki nongtrei Casual kiba shakri ha ki Department bapher bapher jong ka skulbah NEHU kiba don hapoh ka shatri jong ka All North Eastern Hill University Workers’ Union (ANWU) ki la pynlong da ka jingïakhih kaba khlem pud sngi kaba la neh jin haduh lai bnai kynthih da kaba shong kyllaiñ myngngor hakhmat ka ophis treikam jong u Vice Chancellor halor ka jingkynnoh ba ki bor pynïaid jong kane ka skulbah kim shym la lah ban shim rai eiei halor ka jingdawa ban ithuh noh ïa ki kum ki nongtrei bapura.
Khnang ban pynjem noh ïa ka jingïakhih jong ka ANWU, ki bor pynïaid jong ka NEHU ka la thung da ka University Negotiation Committee (UNC) ban lum lut ïa ki jingtip shaphang jong ki nongtrei Casual bad ïa kiba yn sa phah sha ka Ministry of Education.
Nalor kata, ka NEHU kan sa phah lang ïa ki shithi ba la phah da ka All NEHU Workers Union sha u Vice Chancellor ka University naduh ka 29 tarik, Ïaiong, 2022, 28 tarik, Jylliew, 2022 bad ha ka 26 tarik u Naitung, 2022.
Katkum ka jingïathuh jong u Vice Chancellor ka NEHU, ka University ka ladep pyntreikam ïa ka jingsiew bainong kaba katkum ka Central Minimum Wages na ka bynta ki nongtrei Casual ha ki kyrdan bapher bapher naduh u snem 2018.
U la ïathuh ruh ba ïa ka Variable Dearness Allowance (VDA) la pyntreikam manla u snem man ba ïoh hukum na ka Ministry of Labour.
U Prof Shukla u la pyntip ruh ba ïa ka Employees Provide Fund (EPF) bad ïa ka Employment State Insurance (ESI) Scheme la siew shwa ka 15 tarik manla u bnai kumba la bthah.
Ha kaba ïadei bad kane, u President jong ka ANWU u Bah Napolean Mawphniang ha ka jingïakren bad ki lad pathai khubor u la ong ba ka seng ka dawa ban ithuh noh kum ki nongtrei bapura ïa ki nongtrei Casual bad ban pyntreikam ïa ka jingsiew bainong kaba ïaryngkat bad ka kam bad ki trei.
Ki don palat 700 ngut ki nongtrei Contractual kiba trei ha Shillong bad Tura campus jong ka NEHU.
