Shillong, ïaïong, 02: U Bah Joannes JTL Lamare ha ka sngi Saitjaiñ ula ujor sha u Chairman jong ka Meghalaya Human Rights Commission (MHRC) ba kan tuklar halor ka jingshah shoh pynmynsaw lai ngut ki Khasi ha kaba la kynnoh donkti da ki jaidbynriew Nepali kaba la jia ha ka shnong Jatalong, Ribhoi District kaba la jia hynnin ka janmiet sngi Thohdieng.
U Bah Joannes Lamare u la phah ïa kane ka ujor sha ka Commission da kaba kdew ïa ka jingjia ba la pynmih ha ki lad pathai khubor.
“Ba ka 1 tarik, Ïaiong, 2022 ha ka por kumba 6 baje janmiet, lai ngut ki nongshong shnong kiba kynthup ïa u Bah Barnabas Lyngdoh, u Bah Seldron Mukhim bad u Bah Flaming Sten na ka shnong Khyndewso, Ri Bhoi District ki la ïaid lynti lyngba ka shnong Jatalong, Ri Bhoi District haba ki la shah thombor ha ki paidbhur bad kine ki lai ngut ki la mynsaw jur,” ong u Bah Lamare ha kane ka ujor ba u la phah kopi ruh sha u Chairman jong ka National Human Rights Commission, New Delhi.
“Kine ki jingjia la ithuh ba ki dei ki jingpynkheiñ ïa ka hok longbriew manbriew bad ïa kum kine ki jingjia ki buh jingman ïa ka jingim briew dei ban tem noh mardor bad ban pynïoh ïa ka hok sha ki lanot,” u la ong.
U la ong ba ha kane ka jingshah thombor jong kine ki lai ngut ka pynpaw shai ba ka dei ka jingpynkheiñ ïa ka hok longbriew bad ka lah ruh ban lam sha ka jingduhei ki mynsiem briew lada kine ki lanot kim phet mar mar na ka jaka ba la shah thombor.
“Kine ki lai ngut ki lanot ki deihok ban ïoh ïa ka bailutksan halor kane ka jingshah thombor,” la ong shuh shuh u Bah Lamare.
“Kumjuh ruh kane ka jingjia ka lah ban lam sha ka jingpynthud ïa ka shongsuk shongsaiñ bad kan pynjur ïa ka jingïakynad hapdeng ki ar jaitbynriew ki bashong basah ha ki shnong khappud namarba kane ka thaiñ ka dei kaba la shong shnong da ki ar jaidbynriew,” la kdew u Bah Lamare.
“Lada ki jia kum kine ki jingïakynad hapdeng ki ar jaitbynriew kiba sah ha kine ki thaiñ, ïa ki kam pynroi yn ym lah satia ban pyntyllun shakhmat bad kan wanrah ïa ka jingduhnong sha ki paidbah nongshong shnong,” u la ong.
“Namarkata, ngam don lad shuh da kumwei pat hynrei nga kyrpad ba ka Meghalaya Human Rights Commission kan pdiang ïa kane ka jingkyrpad ban leh eiei noh mardor khnang ban ïada na kano kano ka jingeh kaba lah ban mih hadien habud,” ong shuh shuh u Bah Lamare.
