Sha ka KHADC yn mudui ka SNSPU pyrshah ïa u Sordar ka shnong Nonghali

Nongpoh, Naitung 06: Ka jingïalang paidbah ba la pynlong da ka Synjuk Nongsynshar Shnong Par Umkhen (SSMPU) ha ka sngi Saitjaiñ ha jingkieng Umkhen (Thadrang) ka la rai ban mudui sha ka Khasi Hills Autonomous District Council (KHADC) pyrshah ïa u Sordar jong ka shnong Nonghali halor ka jingkynnoh ba u la pyndonkam bakla ïa ka jaka jong ka Raid.
Da ki spah ngut ki paidbah na ki shnong bapher bapher kiba hap hapoh ka East Khasi Hills, Ri-Bhoi bad West Jaiñtia Hills ki la poi ban ïashim bynta ha ka jingïalang paidbah ban pyrshah jur ïa ka jingthmu jong ka tnat Pynroi Sor ka Sorkar Jylla ban pynkynriah ïa ka jaka theh ñiut Marten kaba don ha Mawlai sha Nonghali.
Ka jingïalang ka la rai ban thoh sha u Symbud Myntri Rangbah uba peit ïa ka tnat Urban Affairs Bah Sniawbhalang Dhar ïa ka jingpyrshah jong ki paidbah ban pynkynriah ïa ka Marten sha Nonghali.
Ki shnong kiba kynthup ha ka Synjuk Nongsynshar Shnong Par Umkhen (SSMPU) ki long shnong Nonghali, Mynriang, Nongkhroh, Bamkamar, Thadrang, Khlieh Umwang, Madan Umwang, Umtlieh, Ummluh, Khyndewso bad kiwei kiwei ki la pynpaw ïa ka jingsngewkhia ba ka jingthmu ban pynkynriah ïa ka jaka theh ñiut kan ktah ïa ki paidbah jong ki shnong kiba don sawdong ka wah Umkhen.
Ka jingïalang ka la dawa ïa ka Sorkar Jylla ba kan pyntip sha ki paidbah jong kitei ki shnong haneng lyngba ki lad pathai khubor lada ka thmu ban pynlong ïa ka jingpynsngew paidbah (Public Hearing).
“Lada jia ba ka Sorkar kam sngap ïa ki jingdawa jong ngi bad ka thmu ban thom da ka bor, ngi ruh ngin thom da ka bor ban pynpulom ïa kane ka jingthmu,” la mih ka rai na ka jingïalang.
Ki paidbah, da kawei ka sur, ki la mih shakhmat ban pyrshah jur beit halor ka jingthmu jong ka Sorkar ban pynkynriah ïa ka jaka theh ñiut ha ka shnong Nonghali ba don ha syndah jong ka wah Umkhen kaba dei ruh ka wah kaba ki paidbah jong kitei ki shnong ki ju pyndonkam ban sum ban sait, ban bam ban dih bad kumjuh ruh ban pyndonkam ha ka rep ka riang.
Ki nongkren ha kane ka jingïalang ki long na ki kynhun sengbhalang ba kynthup ïa ka KSU, FKJGP, RBYF, HNYM, ki nongïalam shnong na ki shnong ba hap sha West Jaiñtia Hills District, Ri Bhoi District bad East Khasi Hills District kynthup ruh ïa ki kynthei na ka shnong Jaroit bad na ka shnong Nonghali.