Shillong Risaw 24: Ka Shillong Manipuri Students Union (SMSU) ha ka Sngi Lah U Blei , kala ujor sha ka Deputy Commissioner jong ka East Khasi Hills Kong RM Kurbah ban pyrshah ïa ki kynhun kiba la pyndonkam bakla ïa ka kyrteng bad ïa ka shap jong ka seng ban pynlong ïa ka Ïew die bam ne ka Singju Stall ha Laitumkhrah Police Point ha ka 24 tarik u Risaw.
Katkum ka dorkhas kaba la phah da u President ka SMSU u Chongtam Thangamba Meetei sha ka Deputy Commissioner, ula ujor ba ki katto katne ki kynhun kila pyndonkam bakla ïa ka kyrteng, shap bad ka bannar jong ka SMSU ban pynlong ïaka Singju Stall ha Laitumkhrah kaba sdang naduh ka por 10 baje mynstep haduh 4 baje nohphai sngi.
“Ka SMSU kam don jingpyrshah eiei ban pynlong ïa katei ka ïew die bam hynrei kaba ka seng ka pyrshah jur eh ïa ka jingpyndonkam ïa ka kyrteng bad ïa ka shap jong ka seng khlem da pan jingbit bad kane ka long kaei kaei kaba be-aiñ bha” ong u President ka SMSU.
Ka SMSU kala kyntu ia ka DC ba ka dei ban tuklar mardor ba ki nongpynïaid kim dei ban pyndonkam bakla ïa ka kyrteng bad ïa ka shap bad ïa ka banner jong ka seng.
U Chongtam ula pynpaw ba katei ka jingpyndonkam bakla ym tang ba kan pynthohbria ïa ka SMSU hynrei ka lah ruh ban pynmih ïa ka jingma ban mih ïa kano kano ka jingjia kaba sngewsih.
Ka SMSU kala kyntu ïa ka DC ban shimkhia mardor halor kane ka jingujor bad ki khmih lynti ban pynbeit noh mardor ïa katei ka kam.
