Shillong, Lber 29 : U nongïalam barim ka Confederation of Ri Bhoi People (CoRP), u Bah Bandari Ryntathiang, u la pynïasoh noh ïalade bad ka seng saiñ hima Bharatiya Janata Party (BJP) ha ka jingïalang ba la long ha Mawpun, kaba hap hapoh ka Umroi constituency ha ka 28tarik mynta u bnai.
Ha kane ka jingïalang la sakhi lang da ka jingdon lang u MLA ka BJP na Pynthorumkhrah, u Bah AL Hek, ryngkat ruh u Nongai Ktien ka BJP u Bah Mariahom Kharkrang nalor kiwei ki heh ka party bad ki paidbah nongkyrshan kiba bun ki dei ki nongrep ha ryngkat bad ki nongïalam ka District bad Mahila.
Ha kane ka jingïalang, u Bah Bandari u la pynbna ruh ba un shimti kum u President ka Umroi Mandal. Shwa kane une u nongïalam sengbhalang barim u la ong ba ka jingrung jong u sha katei ka party ka dei namar ka jingïohi jong u ba donkam ban ai ka jingshakri sha ki paidbah lyngba katei ka seng kaba bat ïa u lakam synshar, watla ki la don kiwei pat ki seng saiñ hima kiba la khot sngewbha ba un pynïasoh.
U la ong ruh ba watla ki la mih ki jingkren pyntieng shaphang ka BJP hynrei, ki paidbah ki don ka mon laitluid shano kin ai jingkyrshan bad ym lah hi ban pynbor, hynrei kum u nongïalam un ïarap ïa ki paidbah lyngba ki kam.
Hadien kane la ïoh ruh ïa ka jingkren na u Bah AL Hek uba la pynshai shaphang ki nongrim treikam jong ka party bad ka thong kaba ka party ka don na ka bynta ban ïarap bad kyntiew ïa ka roi ka pa bad ka rukom im jong ki paidbah nongshong shnong ka jylla bad ka ri hi baroh kawei.
