Sha ka 6 ngut kynjoh kiba khlad na ka jingsyllad ki bor mariang, 1 hajar tam kiba shah ktah

Shillong, Jymmang 31 : Ka jingdon ki briew kiba khlad na ka jingsyllad ki bor ka mariang ha kine ki arsngi ka la kiew mynta sha ka 6 ngut.
Tang ha kane ka sngi Saitjain ki la don haduh saw ngut ki briew kiba la khlad bad kine ki kynthup uwei u heprit ba dang 14 snem ba tip kyrteng kum u Mebanskhem Mukhim na ka shnong Kharang kaba hap ha Mawkynrew Block.
Katba arngut kiwei pat ki kynthup ïa iwei i heprit ba dang 7 snem ba tip kyrteng kum i Batgrichi A Sangma bad i heprit ba dang 13 snem ba tip kyrteng kum i Brime D Sangma kiba dei na ka shnong Kentapara kaba hap ha Dadenggre C&RD Block kaba ha West Garo Hills. Kine ki la duh ei ïa la ka jingim na ka jingpom pyrkhat bad leilieh.
Ha kawei pat ka jingjia ha ka 30tarik Jymmang uwei u rangbah ba la 36 snem ba tip kyrteng kum u Bah Nikolas Kharpran na ka shnong Kyrdeng kaba ha Bhoirymbong Block u la khlad noh na ka jingngam jyllop hawah Umlew kaba hap ha ka shnong Mawkduk.
Dang hynin ka sngi ki la don haduh arngut ki briew kiba la duh ei ïa la ka jingim na ka jingngam jyllop bad twa khyndew ha ka iingsah.
Kine kiba khlad ha kane ka sngi Thohdieng ki kynthup ïa ka Kong Klosiya Kharkongor 50 snem na ka shnong Lumkyntung kaba hap ha Laitkroh – 12 shnong Block bad u Bah Samborlang Tariang 35 snem ka ra na ka shnong Mawbynna, Pomlakrai.
Kumba long haduh mynta hi ki la don haduh 49 tylli ki shnong kiba shah ktah, bad haduh 1094 ngut ki briew kiba la mad ïa kane ka jingjïa bad kumba 28 tylli ki iing kiba la julor.
Tang ha East Khasi Hills ki la don bun bha ki jingjia twa khyndew bad twa maw bad shlei um ha kane ka sngi Saitjain. Ha Mawkynrew ka la don ka jingkhyllem u dieng ha ka shnong Kharang. Nangta ha Greater Shillong ka la don ka jingtwa khyndew ha Ardhenu Choudhuri Road kaba la lah ban pynkhuid noh mardor.
Ha Mylliem pat ka la don ka jinghap u maw heh ha kawei ka longiing kaba la wanrah ka jingjulor ïa katei ka iing bad halor kane ka jingjia na ka liang u BDO bda PWD ki la phah ïa ki briew ban leit jurip mardor.
Ha Khatarshnong Block pat ka la don ka jingtwa khyndew ha 12 Mer katba ha Shella ka la don ka jingshlei um ha kaba ar tylli ki iing ki la shah rong noh.
Ha Mawryngkneng ka la don ka jingtwa khyndew ha Mawshbuit bad na ka liang ka ophis u BDO ka la shimkhia ïa kane bad bthah ruh ïa kiba sah hangtei ba kin mih noh shwa shipor.
Ha kane ka sngi ka la don ruh ka jingthut bording bunsien bha ha kiba bun ki shnong la ka long ha Mylliem Block, Pynursla, Mawsynram bad ruh ha Shella Block kumta na ka liang ka MeECL ka la trei borbah ban phah maramot mardor ïa kito ki jaka ba shah ktah.
Kane ka long katkum ka kyrwoh ba la phah da u Executive Director ka State Disaster Management Authority, Meghalaya Shillong.