Sha Ïingbishar yn ujor ka Boundary Committee ïa ka MoU ba soi ka sorkar Meghalaya-Assam

By Mawphor Editor On Apr 27, 2022

Shillong, Ïaïong, 26: Ka Boundary Committee jong ka Khasi Hills Autonomous District Council ba kynthup lang ïa ki nongsynshar Hima na khappud kiba shah ktah ha ka jingpynbeit pud, ha ka sngi Ba-ar ki la shim ïa ka rai ban tied noh ïa ka jingkhang jong ka Ïing Bishar na ka bynta ban tuklar lang halor ka MoU ba la soi da ka sorkar Meghalaya bad Assam dang shen ha nongbah Delhi.
Haba kren bad ki lad pathai khubor, na ka liang ka Boundary Committee hapoh ka jingïalam jong u Bah Jambor War kum u Chairman kumjuh u Bah PN Syiem kum u dkhot ka Committee, ki la ïathuh ba katei ka rai ba ki shim kadei hadien ba ka sorkar ka la pynpaw shai ba kan ym kyrtiang dien shuh halor ka soskular pynbeit pud ha ki hynriew tylli ki jaka ha ka kylla kaba nyngkong.
Lah ruh ban kdew hangne ba kitei ki san tylli ki Hima kiba shah ktah ki kynthup ïa ka Hima Nongspung, Hima Mylliem, Hima Jirang, Hima Jyrngam bad ka Hima Nonglang.
Haba pyntip ïa katei ka rai, u Bah PN Syiem u la ïathuh, “Na bynta kane, ka Boundary Committee ka la thaw ruh ïa ka Coordination Committee ban khlieh da Bah Jambor War, Executive Member Elaka bad ma u kum u dkhot nalor ki san tylli ki Hima kiba shah ktah ha ka jingpynbeit ha ka kylla kaba nyngkong.
“Na ka liang ka Boundary Committee ka la ai bor ha ka Coordination Committee ban ïa syllok bad ïa thir ïa tai halor ki mat kiba donkam bad ki sienjam ba donkam ban leh bad ban pyntip sha ka Committee ban ïoh ïa ka jingmynjur ha shwa ban ujor pat sha ka Ïing Bishar,” la bynrap shuh shuh u Bah PN Syiem uba dei ruh u Nongïalam jong ka Liang Pyrshah ha KHADC.
Katkum ka jingong jong u, ïa katei ka jingujor shen kin sa phah hadien ba ka Coordination Committee ki la dep ban bishar bniah bad phah pat ïa ka kaiphod sha ka Boundary Committee. “Ngin pynstet katba lah ïa kane ka jingujor sha ka Ïing Bishar kumba la ai jingmut da ka Coordination Committee,” u la ong da kaba kyntait pat ban ïathuh bniah halor ka Ïing Bishar kaba kin sa leit ban ujor.
“Shaei kin ujor, kane baroh ka shong ha ka jingstad jong ka Coordination Committee ban rai,” la bynrap biang.
Na ka liang u Bah Jambor u la ïathuh ruh ba katei ka rai kaba ki shim kadei hadien ba kim donlad shuh da kumwei pat hadien ba ka sorkar jylla lyngba ka jingkren jong u Myntri Rangbah bad ruh na u Symbud Myntri Rangbah ki la pynpaw ba kin ym phai dien shuh halor ka MoU kaba la dep soi.