Sha HC yn ujor mukotduma biang ka Congress ïa ki 4 ngut ki MLA jongka ba phet sha ka NPP

Shillong, Nailar 24 : U Nongïalam ka Congress ha kane ka jylla u ma Vincent H Pala u la pynthikna ba ka Party jongu kan sa ujor mukotduma biang ha ka ïing bishar High Court jongka jylla pyrshah ïa ki saw ngut ki MLA jongka kiba phet bad pynïasoh sha ka National People’s Party (NPP).
Kat kum ka jingïathuh jongu kine ki saw ngut ki MLA ba kynthup ïa u MLA ka Mylliem u\ bah Ronnie V Lyngdoh, u MLA ka Umsning u Dr Celestine Lyngdoh, u MLA ka Nongstoin u bah Gabriel Walang bad u MLA ka Mawhati u bah Charles Marngar kin shah pynduh beit ka jinglong MLA halor kane ka jingphet jongki na kata ka daw ka Congress ka rai ban rah biang ïa kane ka kam hakhmat ka ïing bishar ban pynkut syndon ïa kane ka kam.
“ Ngin ujor biang da ka mukotduma ba thymmai pyrshah ïa kine ki saw ngut ki MLA kiba kynthiap Seng” ong u ma Pala uba dei ruh u MP ba rim ka Shillong Parliamentary Constituency. “ Ka All India Congress Committee ka la dep bishar bniah bha ïa kane ka kam na kata ka daw ka la rai ban ujor biang hakhmat ka ïing bishar ban kut syndon kane ka drama”.
U la on ïa kane hadien ba ka ïing bishar High Court jongka jylla dang ka 13 tarik mynta u bnai ka la pynwai noh ïa ka mukotduma ba la ujor mynshwa da u nongïalam ka Congress Legislative Party (CLP) u bah Ronnie V Lyngdoh pyrshah ïa u Lamphang ka ïing Dorbar u Thomas A Sangma uba kyntait ban pdiang ïa ka jingujor ban mait kyrteng ïa ki lai ngut ki MLA kiba phet na ka Congress ha kato ka por kata ïa u Dr Celestine, bah Charles bad bah Gabriel bad pynïasoh sha ka NPP.
Haba kylli u ma Pala u la ong “ La thikna beit ba kin shah mait ïa ka jinglong MLA na kata ka daw ki khroh syndon ïa u bah Ronnie namar ki tip ba kim lah lait na ka jingshah pynduh ïa ka jinglong MLA”
Ha ka jinghisha ka ïing Bishar ka la dep ai notice sha ki lai ngut ki MLA la arsien lynter hynrei ki khlem ai satia kano kano ka jubab ruh.
Kaba sngewthamula ka long ba u bah Ronnie uba ujor mukotduma ïa u Lamphang mynta pat u la leit pynïasoh ïalade sha ka NPP hi kata dang ha ka 20 tarik u Naitung 2025. Hadien ka jingpynïasoh jongu ka Congress ka la kylla Nod hapoh Assembly. Kane ka jingpynïasoh jongu sha ka NPP ka dei da ka jingpdiang bad ithuh jongu Lamphang. Hadien ba u la mih noh na ka Congress u la pynïasoh sha ka NPP ha ka 5 tarik mynta u bnai. Ka Congress ka jop san seat ha ka election MLA 2023 hynrei uwei na kine ki san ngut u Saleng A Sangma u la hiar shuki noh hadien ba u la jop kum u MP jongka Tura Parliamentary Constituency.
Ki lai ngut ki MLA ka Congress u Dr Celestine, bah Charles bad bah Gabriel ki la pynïasoh sha ka NPP ha ka 19 tarik Nailar 2024. La ithuh ïa kane ka jingphet seng jongki da u Lamphang namar ka long ar na ka lai bynta ka jingbun paid jongka Congress ha Assembly.
Wat hapdeng ki jingshah kynthoh kiba bun halor ka jinglong nongïalam jongu, hynrei u ma Pala u la pynpaw ba ka jingkylli ba un hiar shuki kum u President ka Congress ha kane ka jylla kam mih satia.