Nongpoh, Naitung 4: Ka executive committee jong ka Ri Bhoi District Cricket Association kaba la shong jingïalang ha ka 2 tarik u Naitung, 2022 ha ka ophis treikam kaba don ha Umbuda, Nongpoh, ka la shim bun tylli ki rai kaba kynthup ban ïa ka jingpynthymmai nongkitkam bad ruh ban phah ïa ki nongïalehkai kriket kiba kynthup shynrang bad kynthei kiba dang 16 snem ka rta sha nongbah Guwahati ba kin shah hikai ha ka academy.
Ha kane ka jingïalang kaba la pynïaid da u president u bah Rayonald Kharkamni, ki rai kiba la shim ki don hynriew tylli bad la sdang ïa ka jingïalang da kaba u General Secretary, u bah Michael Kharhunai u la wanrah ïa ka kaiphod treikam jong u snem 2021-2022 bad ban pule ruh ïa ki kam kiba ka association ka la trei bad shakri ha ka thain Ri Bhoi ha kaba ïadei ban pynshlur ïa ki khun samla ban ieid ïa ka jingïaleh kai kriket.
Ka jingpynthymmai nongkitkam kadei da kaba la pynkhamti noh ïa u Treasurer barim, u bah Lucky Thangkhiew kum u Vice President bad ïa u dkhot ka CEC, u bah Lebi Marwein kum u Treasurer bad ruh ban thung ïa u Dhruba Thakuria kum u adviser bad u bah Babit Lyngdoh Mawlong kum u dkhot.
Ha ka jingïalang ka la don ruh ka mat kaba ka committee ka la ïakren halor ka jingshna ïa ka madan kaba dang ïaid shakhmat bad khamtam eh kaba ïadei bad ka jaka pdeng lane kaba ki ong ha ka ktien phareng ka pitch, ka jingïapyrkhat ha kaba ïadei ban shna ïa ka dressing room ïa ki player bad ka kamra treikam ha syndah jong ka madan kaba don ha Pahamsning, Nongkhrah.
Ha kaba ïadei pat bad ka rai kaba la ai jingmynjur ban phah ïa ki samla ïalehkai kriket kiba dang 16 snem ka rta, ka committee ka la mynjur ba ka jaka ai jinghikai kadei ban dei da ka Academy bad la jied ïa ka North East Cricket Academy kaba don ha nongbah Guwahati bad ka por ba ki khynnah kin shah hikai ka long shi bnai.
Ha kajuh ka por, lah rai ruh ban pynlong ïa ka prokram kaba kyrpang da kaba yn leit ban iit ïa ki nongïalehkai lane ki player na ki jaka kiba kyndong jong ka thain Ri Bhoi.
Hadien ynda la wai ka jingïalang, ki dkhot ka RBDCA kiba kynthup ïa ka jingdonlang u vice president, u bah Kyrmenlang Uriah, u general secretary, ki nongkitkam kiba shah thung thymmai bad ki executive member hapoh ka jingïalam u president ki la ïa leit ban jurip ïa ka madan kaba dang shna kaba don ha Pahamsning.
