Sha Guwahati pynlong Interview thungkam ka NEHU, khlem treh jubab u Vice Chancellor

Shillong, Naiwieng 09: Ka North Eastern Hill University Students Union bad ka Khasi Students Union, NEHU Unit ha ka sngi Balang ki la leit ban ïakynduh ïa u Vice Chancellor ka skulbah NEHU u Prof. Prabha Shankar Shukla ban pan jingpynshai ha kaba ïadei bad ka jingpynlong ïa ka interview shaduh sorbah Guwahati, Assam ha ka 19 tarik, u Risaw, 2022 na ka bynta ki kam kiba lait ha ka post Controller of Examinations, ha ka post University Engineer bad ha ka post Librarian.
Haba kren bad ki lad pathai khubor, u Advisor ka NEHU Student’s Union u samla Comingstar Kharsyntiew u la ong ba na ka liang u VC u la kyntait mardor ban jubab halor katei bad ki la kynnoh ba u VC u la ong pynban ba kum ki khynnah pule kim dei ban tuklar ïa kane ka kam.
U la ong ba kane ka jingleh jong u VC ka pynsuba sniew pynban ba ka lah ban don kaei re kaei sha lyndet, bad halor kane na ka liang jong ki ki la rai ban buh por tang hapoh 7 sngi ïa u Vice Chancellor ba u dei ban jubab noh lem kumta ki la ong ba kin hap ban shim pat da kiwei ki synjam ba kham tyngeh.
U la ong ruh ba katkum ka rukom, ka skulbah NEHU ka dei ban peit tang ïa ka jingdonkam tang hapoh ka Campus kaba don ha ka jylla Meghalaya bad kumta ïa ki Interview kiba pher bapher ruh dei ban pynlong tang ha nongbah Shillong namarba ka Permanent Campus jong ka NEHU ruh ka don ha kane ka jylla Meghalaya.
Haba bynrap u la ong ba ki bun napdeng ki jaidbynriew jong ngi ruh kiba la biang ïa ka kyrdan katkum ka jingdawa jong ki kam, da kaba buh jingkylli ba balei la khot pat ïa ka interview hapoh ka NEHU Guest House ha nongbah Guwahati.
Shuh shuh u la ong, “Lada kita ki briew na shathie ki kwah ban ïoh kam ha nongbah Shillong ha NEHU balei kim lah seh ban wan interview shane, balei ban hap da leit pynkyrpang shathie? Kane ka paw shai ba ka don ka jingleh sop sop sha lyndet.”