Sha Delhi yn leit ujor ka NEHUTA pyrshah ïa u VC ka NEHU, kynnoh ba don ka jyrsieh bamsap

Shillong, Risaw, 14: Ka North Eastern Hill University Teachers’ Association (NEHUTA) ka la rai ban phah da ka kynhun sha New Delhi ban sei madan ïa ki jingkynnoh bamsap pyrshah ïa u Vice Chancellor u Prof. Prabha Shankar Shukla.
Ïa kane ka rai ki nonghikai ka skulbah NEHU ki la shim ha ka jingïakhih kaba la long hakhmat ka ophis treikam jong u Vice Chancellor ha ka ha ka sngi Baar.
Ka NEHUTA ka la kynnoh ba u Prof. Shukla u la pyllait ïa ka pisa kaba kot T. 82 lak sha ka Manipur Tribal Development Corporation (MTDC), Imphal na ka bynta ka Tura Campus tang hapoh 15 sngi ba la ai ïa ka Work Order, watla ïa ka projek ym pat lah ban pyndep.
Ka Association ka la kynnoh ba u Vice Chancellor u la “ïatreilang” bad ka MTDC ban pyllait ïa ka pisa.
Haba ïakren bad ki lad pathai khubor, u President ka NEHUTA, u Prof. Lakhon Kma u la ong ba ka seng ka la pynrem ruh ïa ka jingbteng jong u ban pep trei la palat 11 bnai hynrei u dang sei pat ïa ka tulop manla u bnai bad kynthoh ba kane ka long kum ka “jingpynsyrwa kai ïa ka pisa paidbah.”
U la ong ba ka kynhun jong ka NEHUTA kan sa ïakynduh ïa ki ophisar jong ka Ministry of Education ban aiti ïa ki sakhi sabut halor ka bamsap bad ka jingtuklar ïa ka bor ka iktiar hapoh ka skulbah.
Kane ka kynhun ki nonghikai ka la ieng pyrshah ruh ïa ka jingthmu jong u Prof. Shukla ban pynïaid ïa ka jingïalang Executive Council ka ban sa long da kaba ong, u la pynkheiñ ïa ka jingbthah ka Ministry ba um dei ban tuklar ïa ki kam jng ka skulbah NEHU.
Nalor ka jingïakhih pyrsah ïa ka jingkynnoh bamsap, ka NEHUTA ka la pynlong ruh ïa ka jingïakhih halor ka jingpynslem ban kyntiew kyrdan, ka jingsahteng ka pisa bai sumar, ka jingpynkheiñ ïa ki Financial Rules, ka jingbym maramot ïa ki iingsah jong ki nongtrei bad kiwei kiwei.
Ka Association ka la byrngem ban pynlong ïa ka jingïakhih tad haduh ba ka Ministry kan da tuklar bad ban wanrah biang ïa ka jingïaid ryntih hapoh ka skulbah NEHU.