Imphal, Risaw 04: U Myntri Rangbah barim ka Manipur u N Biren Singh ryngkat bad lai ngut ki MLA ka BJP ki la leit sha Delhi ha sngi Saitjain ban kynduh ïa ki nongïalam ka BJP ha kaba ïadei bad ka jingthaw ïa ka sorkar kaba thymmai ha katei ka jylla.
Kine ki MLA ki la mih na Imphal ha ka nohphai sngi jong ka Sngi Saitjain ban leit sha Delhi.
Haba kren bad ki lad pathai khbuor ha kadliengsuin, u N Biren Singh u la ong, “Ngi kwah ban pyntip ïa ki nongïalam ka party shaphang ka jinglong jngman ha ka jylla bad ngi kwah ruh ban pyntip ïa ki shaphang ka jingdonkam ban thaw noh ïa ka sorkar kaba thymmai, nangta ki ishu kiba ïadei bad ka jingpynkynriah ïa ki briew (IDP) bad ruh halor ki surok bah,” u la ong.
Katba na ka lïang uwei pat u MLA ka BJP u Thongam Robindor u ba la leit lang sha Delhi u la ong ba ki don katto katne ki MLA kiba kwah bna kynduh ïa ki nongïalam ha ka party.
Ha kane ka jingleit, u Myntri barim ka sorkar u Sapan Ranjan bad u Heikham Dingo ki la leit ban synram lang ïa u Biren Singh ha kane ka jingleit.
Ki tyllong khubor ki ïathuh ba kine ki nongïalam ki la dei ban kynduh shwa ïa u nongpeit jong ka party ha ka thain shatei lam-mihngi jong ka ri bad hadien kata pat kin sa kynduh ïa u Myntri Kampohïing ka Ri u Amit Shah.
Kiwi pat ki MLA kynthup ïa u Lamphang jong ka Ïing Dorbar Thawain ka tei ka jylla la khmih lynti ba kin sa leit sha Delhi ha kine ki khyndiat sngi ban wan.
