Shillong, Nailar 21 : Ka Muay Thai Association of Meghalaya ha ka Lah Sngi U Blei (20 tarik u Nailar) ka la pynbna ba kan phah ïa 10 ngut ki khynnah lehkai jong ka synjuk ban leit ïashimbynta sha ka IFMA Youth World Champion Muaythai 2024 ha Bangkok, Thailand ka ban sdang naduh ka 11 tarik Nailur haduh ka 20 tarik u Nailur 2024.
Haba ïakren sha ki lad pathai khubor ka synjuk hapoh ka jingïalam jong u Bah A Sun kum u President, ka kynhun ka la ïoh ban leit ïakynduh ïa u Director jong ka Sports ka Sorkarkar Jylla- u DD Shira ban ïoh lad jingïarap ha ka liang ka pisa ban kyrshan ïa kitei ki 10 ngut ki ban sa leit ïashimbynta ha katei ka rynsan ïalehkai sha Bangkok.
U Bah A Sun u la pynpaw ruh ba ka jinglut jingsep na ka bynta kine ki khynnah ki ban leit ïashimbynta ka kynthup naduh ka bai bam, bai sah bad kiwei kiwei ka lah ban kot ïa ka T18 lak tam.
Ha ka jingleit ïakynduh ka synjuk ïa u Director ka Sports ka sorkar ka la long kaba seisoh ha kaba na ka liang jong ka tnat Sports ka la kular ban ai jingïarap sha kane ka kynhun kaba la sei ïa 10 ngut ki khynnah lehkai bad 2 ngut ki Official ban leit ïakhun sha ka Youth World Championship Muaythai 2024.
Ka synjuk ka kyrmen skhem ba kane ka jingkular na ka tnat ïalehkai kan long kaba seisoh khnang ba ka jingthmu jong ka kynhun kan ïaid shakhmat.
U Bah A Sun u la pynpaw ruh ba ka kynhun kam shym la leit pan jingïarap satia na kino kino ki kynhun shimet hynrei ka shaniah tylli ha ka sorkar Jylla lyngba ka tnad ïalehkai ban kan ai ka jingïarap. Hynrei watla kata ruh, ka synjuk ka buh jingkyrpad ïa kino kino ki riew shimet khamtam ïa ka sorkar ba kan kyrshan lem ïa ka synjuk na bynta katei ka Championship.
Ki khynnah kiban leit mihkhmat ha ka IFMA Youth World Champion Muaythai 2024 (11 tarik haduh ka 20 tarik u Nailur 2024) ha Bangkok, Thailand ki kynthup ïa 6 ngut ki kynthei bad saw ngut shynrang.
Kynthei: Dasngewtngen E Nongrum, Alphonsa Wriang, Mary Christine Wriang, Aitilin Kharbyngar, Jenefer Mukhim, Madona Taro. Ha ka liang ki shynrang pat ki kynthup ïa u Teiboklang Marbaniang, Dameshwa Marten, Bansah-namkyrpang Warkhyllew bad u Andy Taro.
