Shillong, Naiwieng 18 : Ka PFR Football Academy kan dei ka Grassroots Football Coaching Centre ba nyngkong eh na Meghalaya bad Shillong kaban shah jied ban leit shim bynta ha ka thup ïalehkai Under -11 bad kumjuh ha ka Under -13 jong ka 18th Edition Bangkok International Super Cup kaban long naduh ka 05 tarik – 08 tarik Nohprah ha National Training Centre, Nong Chok, Bangkok, Thailand.
Nalor ba ki leit ban aireng ha katei ka lympung, ka kynhun kan leit ruh ban ïa shim bynta ha ka jingshah hikai kyrpang ba shisngi bad u coach ba la ithuh da ka UEFA (European) ha ka 05 tarik u Nohprah.
Kane ka jingshah jied jong ka PFR Football Academy ka long ruh ka kabu ksiar ïa ka kynhun baroh kawei ban ïoh shuh shuh ïa ka jingtbit na ka lympung ïalehkai ba pawnam jong jong ki ri ka pyrthei.
Ha kane ka Bangkok International Super Cup kin don bun bha ki klob bad ki academy kiban wan shim bynta kynthup naduh Thailand, India, Japan, Philippines, Hong Kong, Taiwan, Indonesia, bad Singapore.
Kumta, da kane ka jingshah jied, ka PFR Football Academy kan jylla long ka Grassroot Centre kaba nyngkong eh na ka jylla Meghalaya khamtam eh na Shillong ban ïoh shim bynta ha katei ka lympung ïalehkai kaba heh ha ka pyrthei.
Ha ka jingïakren bad u Secretary jong ka PFR FA, la sngewthuh ba ka jingshah khot sngewbha na ka iPlay Sports Co. Ltd. ka long beit namar ka jinglah jong ka Academy ban leh bha ha ki lympung ïalehkai kylleng.
Ka iPlay Sports Co. Ltd., lyngba ka Prithivi Sports and Events (PES), ka la ai ka jingithuh ïa ka jinglah jong ka PFR Football Academy lyngba bun ki rynsan bad kane ka la pynlong ïa ki ban ailad ïa ka klob ban mih madan lang ha kane ka lympung.
Haba kylli halor katei ka kabu ksiar ba ki ïoh, na ka liang ka Kong Neri Wahlang ba dei ka Head Coach bad kumjuh u Bah Jewelson Lyngdoh Assistant Coach ki la pynpaw ïa ka jingkmen kaba khraw halor kane ka lad ba kin ïoh ban shim bynta ha kane ka lympung kaba heh ha ka pyrthei.
Ki la pynpaw ruh ba kane ka long ruh kum ka kabu na bynta jong ki ban pynbha bad pynjanai shuh shuh wat ha kaba ïadei bad ka rukom ai jinghikai ïa ki khynnah ïalehkai nalor ba kan long ruh ka jingmyntoi ïa ki khynnah namar kin sngewthuh ïa ka bor bad ka jinglah jong ki haba ki kynduh aireng bad kiwei ki klob na kiwei pat ki ri.
“Nalorkata kane ka rynsan kan plie lad ruh ïa ki samla jongngi kiba don 10-12 snem ban pyni ïa ka sap ba kyrpang ba ki don nalor ba kin ïoh ruh ban pynjanai ïa ka jingtbit jong ki ha kane ka jingïalehkai,” ki la pynpaw.
Ka Head Coach ka la pynpaw ruh ka jingsngewkmen bad sngewnguh ïa ki bor pynïaid jong ka PFR Football Academy kiba la trei borbah na ka bynta ban pyntbit shuh shuh ïa ki khynnah ïalehkai.
Ka la Ïaroh ruh ïa ka jingtrei borbah jong u Bah Rilang Mylliempdah bad Bah Franky Kharumnuid kiba dei ki trai jong ka Academy kiba la plie ïa kane ka lad ban leit aireng ha ka lympung ïalehkai shabar ri.
Ki nongïalehkai ha ka kynhun Under -11 ki kynthup ïa u heprit Mewanbanshan Khyriem (GK), Bakhamkynjai Kurkalang, Rodonald Jana, Mehinangker Nongrum, Rizwan Khan, Ksanbok Syiemlieh, Brayden Thawmuit, Daniel Suting, Mebhabok Tariang, Alneson Baino, Neil Ryan Kharbhih bad u Confixly Nongbri.
Katba ha ka Under 13 pat ki kynthup ïa u heprit Graham A Nongkynrih (GK), Manlongkhraw Wahlang, Aronzorian L Peinlang, Unsan Tista Warkhyllew, Jazen Aiden L Mawphlang, C. Pyngrope, Damewanshwa Baino, O Wandondor Kharir, Nathaniel Kharkongor, Damebandon Mawkhroh, Kitdor Kynsai Kharbudnah bad u Haban Blah.
