Nongpoh, Nailur 25: Ka jingjyllei ki kam sniew katba nang mih ki sngi ka la nang shyrkhei ha ka jylla jong ngi bad pynsuhjer ïa kiba bun ki paidbah ha ka imlang ka sahlang khamtam ki kmie ki kpa kiba dang don ki khunrit, namar ka pyrthei kam shngaiñ shuh na ka jingbun ki runar kiba tuh, lute bad wat ka kam pynïap briew ha kaba kam don shuh ka jingïatiplem bad ka jingkheiñ parabriew.
Sa kawei pat ka jingjia, uwei u heprit ba dang 9 snem ka rta na ka shnong Bir, ka shnong kaba don la lynti ban leit sha ka shnong Mawrong ha Ri-Bhoi District, u la shah bret ha ki runar bym lah ban ithuh sha kawei ka jaka ba long khlaw ha katei ka shnong hadien ba ki la law ruh ïa ki jingdeng ksiar jong u.
Katkum ka jingïathuh ka kmie jong utei u heprit, ka la ong ba hynnin ka janmiet ka la phah leit shim jingbam sñiang ïala u khun na iing jong I meikha ha ka por kumba 4 baje eiei, ryngkat kawei ka borti ban rah jingbam sñiang hynrei utei u heprit u khlem wanphai iing shuh, hadien ka jingslem jong u ban wanphai ka kmie ka la pyrshang ban khot bad pyrta ïa ka kyrteng jong u ba un wan phai kloi noh shala iing hynrei um thie bad um jubab satia.
Hadien ka jingslem jong u ban wanphai na ka liang ka kmie ka la khang ïa ka iing ban leit wad ïa u ryngkat u kurim u ba la wan trei ha katei ka por, ha kaba ki la lap nyngkong ïa borti sñiang bad ha kum kata ka por ryngkat ki paidbah ki la mih ban leit wad ïa utei u heprit ha katei ka jaka ba marjan bad dei ha ka por kumba 6:30 eiei janmiet la lap noh ïa utei u heprit hapdeng ka jingbym tip briew bad hadien ka jingkylli bad tohkit u la ïathuh ba ki runar ki la set ïa ka shyntur jong u, bad phah law ruh ïa ki jingksiar.
U la ïathuh ba ha kum kata ka por kitei ki runar ki la mut ruh ban thep ïa u ha kali, hynrei u la ïohsngew ba ba uwei napdeng ki runar u la ong kumno ngin thep sha kali haba dang shai ïoh don ba ïohi.
Shuh shuh kitei ki runar ki la bret ruh ïa utei u heprit sha khlaw ha jan katei ka jaka bad tap da ka sla kait baroh shirynieng haduh ban da lap ki paidbah katei ka shnong.
Tang hadien katei ka jingjia, la rah noh ïa utei u heprit sha Umsning CHC na ka bynta ban phah eksamin ha kaba la lap ruh ba ka la don ka dak mynsaw ha ki bynta ka kjat hadien ba kitei ki runar ki la iuh ïa u.
Tad haduh ban da thoh ïa kane ka khubor ki bahaiing lem bad ka shnong kim pat ai kano kano ka jingujor sha ki pulit.
