Shillong, Ïaïong 24: Ka Meghalaya kala rem noh ha ka Andhra Pradesh ha ka jingïakhun kaba khadduh na ka Elite Group A jong ka lympung ïalehkai Women’s Senior T20 League kaba long ha ka sngi U Blei ha Puducherry. Hadien ba kala jop ïa ka jingkynting pisa kaba dei ruh ka sien kaba nyngkong, ka Meghalaya kala kam ban kawang bol nyngkong bad khur hynñiew wicket ha kaba ka Andhra Pradesh ka kamai 162 ron na ki 20 over.
Ka Deiphibapynshngain L Mawnai kala lah ban kawang bol bha ha kaba kala khur marwei 3 wicket ai kamai 26 ron, ka Ajima Sangma ka khur 2 wicket ai kamai 27 ron bad ka Debasmita Dutta 1 wicket ai kamai 36 ron. Ka Suriti Kumari Ray ka khyrwit saw tylli ki four bad kamai 18 ron hynrei ka Meghalaya kala shah pynkhyllem lut baroh ki wicket bad kamai tang 51 ron bad kut noh syndon ka jingïaid lynti ha katei ka lympung.
