Shillong, Nailur 07: Ka kynhun ki thei ïalehkai phutbol jong ka Meghalaya ki la mad ïa ka jingshah rem kaba jur ha ka jingïalehkai kaba sdang jong ki ïa ka 30th Senior Women’s National Football Championship na ka bynta ka Rajmata Jijabai Trophy 2025-26, ha kaba ki la liem kput haduh 7-0 kol ha ka West Bengal.
Lah ban kdew ba kane ka jingïakhun ka long kaba noh shiliang, ha kaba ka West Bengal ka la pynskhem ïa ka jingjop naduh ka kylla step, da kaba lamkhmat haduh 5 kol khlem da ailad ïa ka liang pyrshah ban pynphai wat tang kawei. Kine ki san kol ha ka kylla step la thep da ka Sulanjana Raul (4′, 11′), ka Sushmita Lepcha (31′), ka Mousumi Murmu (37′) bad ka Rimpa Haldar (45’+2).
Ka Sulanjana (55′) ka la ïoh ban bynrap sa kawei pat ka kol ha ka kylla miet ban kynjoh ïa ka hat-trick, nangta ka Mamata Hansda (61′) ka la pynkhih ïa ka kol kaba khatduh. Ka Sulanjana, kaba la thep hat trik ka la ïoh ban khur ïa ka nam Player of the match.
Kane ka kynhun ki thei ïalehkai ka jylla ba la ïalam da u Kitbor Kharkongor kan ïakhun pyrshah sa ïa ka Sikkim ha kane ka sngi Nyngkong (08 tarik Nailur, 2025). Ka Sikkim ka la jop ïa ka jingïalehkai kaba sdang da 2-1 kol ïa ka Railways.
Ka thup ki thei ïalehkai ka Meghalaya kiba la mih madan ha kane ka jingïakhun ki long: Ribansi Jamu (GK) (bujli -Banrisha Wahlang 84′), Baiahunshisha L Nongbri, Saralin Warlarpih, Darishisha Kharlyngdoh, Badarishisha Kharumnuid (bujli – Ibashembha Khongsit 60′), Catherine Kharkongor (bujli -Makrisha Songthiang), Ibakordor Wahlang, Marbarin Nongrum, Iaraplang Nongrum (bujli – Eiladki Ksoo 60′), Nisilia Majaw (bujli -Inrila I-dor Khongthaw 84′), Ribahunshisha Kharshiing.
