Senior Men Challengers Cup: Liem noh ka Umïam Eagles, rung ka Nokrek Tigers & Myntdu Lions sha ka final

Shillong, Ïaïong 05: Ka Umiam Eagles kala duh rung sha ka final jong ka lympung ïalehkai Senior Men Challengers Cup ba pynïaid da ka Meghalaya Cricket Association (MCA) hadien ba ka Symper Panthers kala jop da kaba pynliem da 99 ron ha ka jingïakhun ha ka sngi Ba-ar.
Ka Symper ka kamai 267/7 wicket ha ki 50 over bad kala pynkhyllem lut ïa baroh ki wicket jong ka Umïam kaba kamai tang 147 ron.
Ka Eagles ha kane ka jingïalehkai ka donkam ban khur jingjop ban ïong rung sha ka final, katba ka Panthers, kaba la rem noh ha baroh laisien ki jingïalehkai ba lah dep, kala ïalehkai ban pyndep ïa ka jong ka bynta bad kala lah shisha ban ïalehkai bha ha kane ka jingïakhun kaba khatduh. Ha kane ka jingïalehkai ba mynta ka sngi, ki don bun ki nongïalehkai kiba tbit, kiba la kynjoh sha ka kamai century, ka kynhun ba kamai bun ron bad ka team kaba nyngkong ban tied ïa baroh ki 50 over.
Ka Symper kaba la jop ïa ka jingkynting pisa kala kam ban tied nyngkong, ha kaba u Kishan Lyngdoh uba dei u kapten uba la tied sdang u la ïalam ïa ka kynhun da kaba kamai 102 ron na ki 123 bol da kaba khyrwit khyndai tylli ki four bad ka six ron. U la mih tied lang ha ryngkat ka jingïarap u Swarajeet Das, uba la kamai 80 ron da kaba khyrwit shiphew tylli ki four bad kine ki arngut kila kamai ron lang da 159 ron, kaba dei ka jingkamai kaba hehduh jong kane ka lympung .
Ïa baroh laisien ki jingïalehkai ba lah dep na bynta ka Panthers la pynduna noh ki over ïalehkai na ka daw ka jingshah pynthut ha ki bot ka mariang, hynrei ha kane ka sngi pat kila ïoh ban ïalehkai pura ha kaba u Lyngdoh bad u Das kila lah ban ïalehkai bha. Kila pynshaïong hi ngaiñ ïa ka Eagles hashwa ba u Aditya Singhania (1/40) u la ïoh ban pynhap noh ka wicket u Das da kaba kem hi ïa ka bol.
U Lakhan Singh, uba khur 5/37 pyrshah ïa ka Lions ha ka jingïalehkai ha ka sngi U Blei, mynta pat u khur 4/42, ba kynthup ïa ka wicket u Lyngdoh. Kiba bun ki rangïalehkai ka Eagles kila leit ban ai khublei ïa utei u kapten jong ka Panthers ha ka jingmih noh jong u napdeng madan.
Ka Umiam ruh khlem da duh mynsiem kala sdang ban kamai ron bun haba beh ïa kate katei ka thong, ha kaba u Raj Biswa (30) bad u Bamanbha Shangpliang (20). Kitei ki rangtied kamon bad kadiang kila lah ban bun ka ron kaba biang bha na bynta ka kynhun kaba la pynsmiej ruh ïa ka kynhun jong ka Symper.
Hynrei ka jinglah ban khur wicket u Babloo Passah (3/16) kala sdang ban pynduh bor ïa ka kynhun, ha kaba u la ïoh ban pynhap ïa ka wicket u Biswa bala ïoh kem da u Lyngdoh, kaba la pynkut noh ïa ka jingkamai ron da da 55 ron jong kitei ki arngut.
Kiwei pat kiba la khur wicket ki kynthup ïa u Bijon Dey (4/29) bad Himan Phukan (3/17). U Lyngdoh u la khur ïa ka khusnam Player-of-the-match.
Mynta ka sngi Balang ka jingïakhun kan long hapdeng ka Simsang Sharks kaba don sha trai duh pyrshah ïa ka Nokrek Tigers kaba don ha khlieh duh.