– Rgh. O. Pyngrope, President Seng Khasi Kmie
Ka Seng Khasi Kmie mynta ka sngi ka la kynjoh sha u mawjam uba 126 ha kane ka Lyngkhuh Snem kata ka 23 Naiwieng 2025.
Ha kane ka jingïaid lynti lyngba ki por bad ki snem kiba la leit noh bad haduh kine ki sngi ka juk mynta, ka Seng Khasi ka ieng skhem halor ki Nongrim jong ka Tipbriew Tipblei, Tipkur Tipkha bad ban kamai ïa ka hok, ka jingngeit ha u Blei Trai Kynrad Nongthaw Nongbuh.
Ha kane ka Lyngkhuh snem jong ka Seng Khasi ngi kynmaw burom ïa ki matti ksiar jong kito ki rangbah kiba long ki nongseng nyngkong eh ïa ka Seng Khasi ha ka 23 tarik Naiwieng 1899, kiba long ki nongprat lynti bad ïalam lynti ba ngi ki khun ki ksiew u Hynniewtrep ngi dei ban ieng rangbah ban ïada bad ïai pynneh pynsah ïa la ka jong ka hok longbriew ryngkat ka niam ka rukom, ki riti- ki dustur bad deiti kumba la seng la buh da ki longshuwa manshuwa jong ngi.
Ngi kynmaw burom ruh ïa kito ki rangbah bad ki longkmie kiba la leit noh (Bam kwai ha dwar U Blei) kiba la ïa kit ïa bah lem ïa ki kam bapher- bapher jong ka Seng. To ngin ai ka burom kaba khraw na ka bynta ki longshuwa manshuwa , ki President Secretary bad baroh kiba la ïa tynrong ban ïa kit ïa bah ïa ki kam jong ka Seng ha la ka jong – ka jong ka bynta. To ngin skhem ha la ka jong ka tynrai jingngeit niam jingngeit Blei. To ai ba ngin long kiba sian kiba stad bad ba shemphang ban ym shah pyntieng- pynbieit hano-hano. To ai ba ngin nym bakla lynti lano-lano ruh kumba ong ka ktien sneng “Ieit ïalade bad burom ïa kiwei”.
Ngam lah khlem da pynpaw ïa ka jingsngewnguh ïa ki tnat treikam bapher-bapher jong ka Seng Khasi Sein Raij kumjuh ruh ïa ki tnat bad jylli treikam bapher- bapher kiba ïai ïa trei shitrhem khlem thait bad khlem tyngkai ïa la ka jong ka bor bad por ban ieng skhem ha la ka jong ka Niam Tynrai kumba ong ka jingrwai Seng :
“I’U khun bynriew bun jait hi la thaw,
la Niam la rukom ki da don,
L’U Nongthaw ban ïaroh.”
Ka jingkynmaw ieit bad burom ka leit ruh sha ki riew rangbah samla kynthei bad shynrang ki bym lah ban wan sha madan Lympung hynrei ki pyndonburom ïa kane Lyngkhuh Snem ha la ki jong- ki jong ki shnong ki jaka ne wat shabar ka ri Khasi ruh.
To ai ba kane ka jingpynhap pyrda ïa ka Lyngkhuh snem ba 125 kan plie lad plie lynti ban ngin nang ïa kiew irat ha ki liang baroh.
– Rgh. O.Pyngrope, President Seng Khasi Kmie, H.Q. Mawkhar, Shillong.