Shillong, Jylliew 22 : Ka Mother’s Union, Tura ka pynpaw ïa ka jingkmen kaba khraw halor ka jingseisoh ka projek COME (Community Onward Movement for Education), ka sienjam kaba buh thong na ka bynta ban kyntiew ïa ka pule puthi ha nongkyndong.
Ïa kane la pyllait padibah ha ka jingïalang kaba long ha ka 21tarik Jylliew ha Working Women’s Hostel, Mission Compound Tura ha kaba la donlang naduh ki riewshemphang kiba don bynta ha ka pule puthi ha ka jylla.
Ka jingïalang ka la sdang da ka jingduwai bad ki kyntien kyntu kynpham na u Rev. Janarius, Principal jong ka Don Bosco College uba la ai ka jingïaroh kaba khraw ïa ka Union na ka bynta kane ka jingmait lynti jong ki.
Na ka liang ka President jong ka Mother’s Union ka la pyntip ba kane ka projek COME ka long kum ka jingïakhun na ka bynta ban kyntiew ïa ki skul ha nongkyndong. Ka la pynshai ruh ba kane ka projek kam dei eh ban shimti ïa ka skul tang ha ka kyrteng hynrei ban kyrshan lang ïa ki ha ka jingïaid lynti, ban pynbiang ïa ki jingdonkam bad khamtam tam eh na ka bynta ban pynwandur ïa ka burom ka akor.
Hadien kane ka la don ruh ka jingpyni bniah ïa ka thong bad ka jingmut jong kane ka projek bad kumno kan ïarap nangne shakhmat.
Bun ki riewshemphang bad ki nongïalam ha ka pule puthi ki la shim bynta lang ban ïatai ha katei ka jingïalang. Na ka liang u Tyrone D Brass, Headmaster bad trai jong ka Learning Sanctuary u la mih lang shakhmat na ka bynta ban ai lang ka jingkyrshan ïa katei ka jingïakhun jong ka Mother’s Union na ka bynta ban shim lang ïa ka bynta ban kitkhlieh ban kyntiew ïa ka pule puthi ha ka jylla.
Ka Vice Chancellor jong ka Captain Williamson University ruh ka la pynpaw lang ïa ka jingkyrshan da kaba tyrwa ba kan don ka jingïatreilang lyngba ki prokram jong ka skulbah bad ki jingai jinghikai. Ka ong ruh ba ki jaka pule ki dei bna snohkti lang ha kaban kyntiew ïa ki jaka pule kiba donkam ïa ki jingkyrshan.
Ha kajuh ka por ka Education Commissioner barim ka jylla, ka Lutherine R Sangma ka la ai ka jingbatai kaba bniah halor kijingeh kiba ki skul sorkar ki kynduh bad ong ba kane ka projek COME ka wan ha ka por kaba biang.
Kane ka long katkum ka kyrwoh ba la phah da ka Smit Sume Chandola B Sangma ba dei ka General Secretary jong ka Mother’s Union Tura ha kyrteng jong ka COME – Community Onward Movement for Education.
