SHILLONG, ïaïong 08: Ka East Khasi Hills District Wushu Association (EKHDWA), hapoh ka jingpeit jong ka Meghalaya Wushu Association (MWA) ka la lah ba kan pynlong ïa ka lympung ïalehkai ‘5th East Khasi Hills District Wushu Championship 2026’ kaba jop bad kaba seisoh ha ka 06 tarik ïaïong, 2026 ha Laitkyrhong Sports Hall.
Kane ka Championship ka la sakhi ïa ka jingïashim bynta kumba 150 ngut ki nongïalehkai kiba la mihkhmat ïa ki klob bad synjuk bapher bapher ha kylleng ka District. Ki klob ba ladep ïasoh kiba ïashim bynta ki kynthup ïa Donita Elite Warrior Martial Arts Gym (DEWMAG), Stay Strong Fitness School (SSFC), Lamphrang Combat Academy (Smit), Madanryting Martial Arts Physical Fitness Club (MMAPFC), bad ka H. Elias School (Nongthymmai), ryngkat bad ki dkhot ba don jingïadei jong ka Tribal Combat Academy (TCA).
Kane ka lympung ka la wanrah ïa ka jingïalehkai kaba ha khlieh duh, kaba pynpaw ïa ka jinglong ryntih bad ka mynsiem ïalehkai hapdeng ki nongïa shim bynta.
Haduh kaba kut jong ka jingïakop ka kynhun ïalehkai kaba la ïoh ïa ka nam lahduh kadei ka Donita Elite Warrior Martial Arts Gym (DEWMAG): bud sa ka kynhun ki nongïalehkai jong ka Stay Strong Fitness School (SSFC) ha ka kyrdan ba ar lane lst Runner-Up; nangta ka Madanryting Martial Arts Physical Fitness Club (MMAPFC) ha ka kyrdan ba lai lane 2nd Runncr-Up.
Nalor ki khusnam lahduh sha ki kynhun la ïoh ruh ban sam ïa ki khusnam shimet sha ki nongïalehkai ba kynsai: ha kaba u Wankitboklang Kharkongor u la khur ïa ka Best Player (Sanda); nangta u Kyrshanbor R. Songthiang u la khur ïa ka Best Player (Taolu).
Kaba kham sngewtynnad ka long ba u Kyrshanbor R. Songthiang, uba la ïoh ïa ka khusnam Best Player ha ka Taolu, u la shah jied ban mihkhmat ïa ka India ha ka lympung ïalehkai Wushu jong ka pyrthei ka ban sa wan ha Moscow, Russia.
Kane ka championship ka la sdang da ka jingkren ai khublei na u bah Donny R. Ranee, President jong ka Meghalaya Wushu Association bad ka EKHDWA. Ha ka sngi plie pyrda la wan kongsan da u Rangbah Shnong ka Laitkyrhong-bah S. Rynjah, ha ka jingïadon lang kiwei de kiba la shah khot sngewbha.
Ïa ka jingïalang pynhap pyrda la pynïaid da u bah B. Mylliem, President, bad u bah R. Rynjah – Secretary ka Laitkyrhong Sports Club ryngkat ka jingdon lang ki dkhot jong ka club bad ki nongkitkam, bad ïa ki kyntien ai khublei la ai da u bah Kitbok Dkhar, General Secretary ka HDWAEK.
Na ka liang jong ka EKHDWA, ka la ai khublei ïa baroh ki nongïashim bynta na ka bynta ki jingïalehkai kiba dei ban ïaroh bad pynpaw ïa ka jingsngewnguh kaba khraw ïa baroh ki nongpynïaid, ki dkhot, bad ki nongkyrshan kiba ka jingpyrshang jong ki ka la ïarap ban pynlong ïa kane ka lympung kaba jop.
Kane ka long katkum ka kyrwoh na ka East Khasi Hills District Wushu Association (EKHDWA).
