Shillong, Naiwieng 18: Watla ka dei ka sien nynkong ban ïoh pynlong ïa ka rynsan ïakop siat hapdeng ki skul kaba la tip da ka 1st Inter-School Shooting Championship 2024, hynrei kane ka lympung kaba ar sngi lynter ka la long kaba jop ha kaba hynriew tylli ki skul ki la wan ïashimbynta.
Kane ka Championship ka la sdang naduh ka 16 tarik haduh 17 tarik mynta u Naiwieng, ha Indoor Shooting Range – Air Force Station, Laitkor, Shillong, ba la pynlong da ka Shooting Association of Meghalaya ryngkat ka jingïatreilang bad ka Laitkor Shooting Club, Airforce Station, Laitkor, bad da ka jingkhmih jong ka National Rifle Association of India (NRAI).
Kane ka jingïakop siat Air pistol bad Air rifle 10M ka la lumlang ïa ki 20 ngut ki khynnah samla na ki hynriew tylli ki skul kiba la ïa khun ha ka 10M Air Rifle bad 10M Air Pistol, bad pyni shibun ki sap kiba phylla lyngba ka jingtrei shitom, bad ka jingminot ha ka jingïalehkai.
Ha ka sngi khylliap pyrda la wan sakhi ruh da ki heh na ka Shooting Association of Meghalaya, ki nongmihkhmat na Laitkor Shooting Club, bad ki heh na NRAI.
Haba kren ha ka jingïalang, u Wing Commodore u la pdiang sngewbha ïa ki nongïalehkai, ki kmie ki kpa, bad ki nongïalam na ka Shooting Association of Meghalaya (SAM), bad pynpaw ba ka Laitkor Shooting Club ka kloi ban ïatreilang bad SAM-NRAI ban pynlong ïa ki jingïalehkai kiba ai jingmyntoi ïa ki samla ka jylla Meghalaya. U la pynpaw ruh ka jingkmen ban ïohi ïa kiba bun ki nongïashim bynta ha kane ka 1st Inter School Shooting Championship 2024.
Na ka liang jong u President ka Shooting Association of Meghalaya bad Vice President ka National Rifle Association of India, u Bah John F. Kharshiing, u la ong, “Kane ka jingïalehkai kam dei tang ka jingïakop hynrei ka jingrakhe ïa ka sap bad ka jingtrei shitom. Ka thong jong ngi ka long ban pynshlur bad thaw lad ïa ki nongïa siat suloi ban poi sha ki kyrdan ha ka National bad ha International”. U la bynrap ruh da kaba pynkynmaw ba kane kan ïarap ruh ïa ki samla ban pynkhreh ïalade ha kaba ïa dei bad ka 6th Meghalaya Games kaban sa long naduh ka 20 -25 tarik Kyllalyngkot 2025.
U la ai khublei ïa ki kmie kpa kiba la pynshlur ïa ki khun ban wan sha khmat ha ka sports da kaba kdew ba mynta ki don ki lad jingiarap ha kaba ki nongjop ki ïohpdiang da ka cash award bad ka sports scholarship, bad u la kyntu ïa ki samla ki kmie kpa ban pule ïa ka Meghalaya Sports Policy 2019 bad u kyrmen ba lyngba ka jing kyrshan bor bah na ka Sorkar Meghalaya shen kin sa mih ki sap ba kyrpang ha ki Olympic Sports kiban sa poi ruh wat sha ki kyrdan National bad International.
Ka jingïalang ka la kut da ka jingai khusnam ïa ki nongjop da u Wing Commodore bad u President ka Shooting Association of Meghalaya.
Kiba ïoh khur khusnam ha kane ka C’ship ki long:
Ha ka thup 177 Peep Sight Air Rifle NR:
Sub Youth Women
1. Kopal Dubey – Ksiar, Surbhi Singh- Rupa, na ka APS School. Sub Youth Men: Abhimannyu-Ksiar, H Susaanthlai-Rupa, Dhanistha Thakuria- Rnong, na ka APS School. Youth Women: Syesha O Hek-Ksiar, APS School. Youth Men: Mayank Vats- Ksiar, Mannat Yadav- Rupa, Ishaan Sharma- Rnong, baroh na ka APS School.
Ha ka thup.177 Air Pistol NR: Sub Youth Women-Lalgouhao Singson – Ksiar, Mizo High School. Youth Women: Da-i- Labynta Ryntathiang- Ksiar, ST John White Hall. Youth Men- Lamphang M Allya- Ksiar, Government Boys Higher Secondary School.
