Nongpoh, Naitung 08 : Ka Thrills Society bad ka Motors Sport Club ka Meghalaya ha ka sngi saitjaiñ ki la pynkut noh ïa kawei na ka jingïakop jngi ba la tip kum ka ‘ 2nd Thrills Swimming Competition’ kaba la sdang ha ka 5 tarik u Naitung bad pynhap pyrda ha ka 6 tarik u Naitung ha Thrills Fun Park kaba don ha ka Shnong Mawleiñ Mawkhan ha Ri Bhoi District.
Ha kane ka jingïakop jngi la wan poi haduh 76 ngut ki nongshim bynta na kylleng ki jaka ka jylla bad lyngba kane ka rynsan kiba bun ki nongshim bynta ki la ioh ban sei madan ïa ki sap kyrpang ba ki don ha ka kam jngi um, ha kaba la phiah ha kiba bun kyrdan kata naduh ki ba hapoh ka 10 snem ka rta,14 snem, 17 snem, 18 snem shaneng bad 35 snem shaneng.
Ki rukom jngi ba la pynïaid ha kane ka jingïakop jngi ki kynthup ïa kata ka Freestyle, Backstroke, Butterfly, Breaststroke, bad Medley Relay formats.
La wan ruh ban shim bynta ha kane ka jingpynhap pyrda ïa ka jingïakop jngi da ka jingdon lang u Bah William Hek, Promoter, Thrills Society, u Bah Jayden Nongkhlaw – National Motocross Rider, u Bah Arted Kharsati u dkhot ka Motor Sport club ka Meghalaya, u Bah P.K Kurbah, Rangbah Shnong Mawlein Mawkhan, u Bah Eugene Niangti – President, MSCM lem bad kiwei ki riew rangbah.
Na ka liang ka Thrills Society bad ka MSCM kum ka jingpynshlur ïa kiba la wan ban shim bynta, ka la sam ruh da ki trophy, ki syrnod bad ki jingai sngewbha sha kito ki nongjop ha kane ka jingïakop jngi ba la pynïaid ha ki kyrdan bapher bapher.
Haba pynpaw halor ka thong jong kane ka jingïakop jngi ba la pynlong ha Thrills Fun Park, ki nongïalam ki la pynpaw ba ka jingpynlong ïa kane ka jingïakop jngi kam dei satia tang ban ithuh ïa ki sap kyrpang ba ki don ha ki kam ïakop jngi bad ka dei ruh shi bynta ban pynlong ïa ki samla ba kin don ïa la ka sap bad khamtam ruh na ka bynta ka koit ka khiah jong ki.
