Shillong, Nailar 31: Ka kynhun “KAM Meghalaya” kaba dei ka kynhun jong kiban ïakhun ïa ka ilekshon kaba la ïalam da ka Kong Angela Ryngngad ryngkat u Pastor Kyrsoibor Pyrtuh ha ka sngi Balang ki la pynbna sa ïa kawei ka kyrtong ka Kong Wanpynhun Kharsyntiew kaba shong ba sah ha Malki khlieh shnong ba kan ïakhun ïa ka ilekshon MLA na East Shillong Constituency.
Haba kren ha kane ka sngi ka Kong Wanpynhun ka la ong ba ka jingmih sha khmat ban ïa ai reng ka long ban long ka sur ïa ki nongtrei nongbylla, kiba duk ba kyrduh, ki khun samla khlem kam khlem jam, ki khynnah skul bad ïa kito kiba ym ju don ban kren ïa ka bha ka miat jong ki.
“Lada phi peit ha ka pule puthi ngi dei kiba shadien tam bad sngewsih ba kum ka jylla ba la kynjoh 50 snem ka rta kam pat don satia wat tang ka skulbah ba pynïaid da ka sorkar jylla” ka la ong.
Ka Kong Angela ka la ong ba ka jingmih sha khmat jong ka KAM hi ka dei ban ïakhun pyrshah ïa ka bamsap bad ka bor pisa tyngka kaba la bam kruiñ ïa ka jingkiew sha khmat ka jylla.
Ka la ong ruh ba kiba bun ki nongmihkhmat kiba ha shuwa ka ilekshon ki pynsawa jam ïa ka sur bad a ki tyngam jong ki, ba ki dei ma ki ban kren ïa ka bha ka miat ki paidbah katba ka jingleh jong ki pat ka long mar khongpong bad kaei kaba ki leh pat.
Haba ïadei bad ka jingpyndonkam pisa ha ka ilekshon, na ka liang ka Kong Angela ka la ong ruh ba baroh ki nongïalam saiñ pyrthei kiba don ha ka bor ki dei kiba la pynsawa jam ïa ka sur jong ki ba kin ïakhun ïa ka bamsap hynrei ka kam ba ki leh kam ïahap satia bad ka la kyntu ruh ïa ki paidbah ba kin bishar ïa ka jinglong jingim, ka leit ka wan bad baroh ki liang kaei kaba ki kren ka ïahap dur ne em bad ka kam jong ki.
Ka Kong Angela ka la ong ruh ba ka Kong Wanpynhun kaba a shakri ïa u duk u suk khamtam eh ïa ki nongbylla kynta ha sor ka sngewthuh bha ïa ka jingeh kaba ki ïa kynduh.
Kumban shu kdew hangne ïa ka East Shillong la mihkhmat da ka Kong Ampareen Lyngdoh kum ka MLA bad ka la jop ruh na kane ka seat naduh u snem 2008.
