Shillong, Nailur 19 : Ka kynhun jong ka Young Talent Badminton Club, Mawlai ka la sei ïa 20 ngut ki khynnah ïalehkai shynrang bad kynthei ban leit ïashim bynta ha ka lympung ïakhun badminton ba la tip kum ka 37th Meghalaya State Badminton Championship 2022 ka ban long ha Tura, West Garo Hills.
Katei ka tournament kan sdang ha ka 21 tarik bad kan kut ha ka 24 tarik mynta u Nailur 2022.
Ki nongïalehkai ha ka liang ki kynthei ki kynthup ïa ka Catheresa Lyngdoh, Cathrienen Lyngdoh, Zinia M Kahit bad Laniarka Tymthai katba ka kynhun ki khynnah shynrang ki kynthup ïa u Lawanbiang Wanñiang, Namtam Kharbuli, Donborson Warjri, Vikey Nongrang, Mark R Jala, Hasel Shabong, Jayden toi Marbaniang, Yoshuwa Ebormi Wahlang, Da OO Paia Pakyntein, u Jayden Syiemlieh, Dasanpaka Kharduia bad u Yowandame Toi Marbaniang.
Ïa katei ka kynhun la ïalam da u Bah Benny Kharbuli kum u team manager bad Dai Kynsailang Mylliem Umlong kum u coach.
Na ka liang ka klob ka la ïakynduh ïa kine ki khynnah shuwa ban mih na Shillong bad ki la ïoh ka jingkyrkhu kyrdoh na ka ki dkhot jong ka klob bad kitbok kitrwiang ba kin ïalehkai bha bad pyni ïa ka sap kaba ki don.
Na ka liang u Bah Sunny B Warjr uba dei u Secretary u la pynpaw ka jingsngewnguh ïa baroh kito kiba la noh synñiang ïa ka klob bad ka klob ka da sngewnguh eh ïa kito ki paralok kiba ai kylluid mynsiem na ka bynta ki jingdonkam jong ki khynnah.
