Sei ka TMC da u Bah Sounder na Mawkyrwat, yn pynïasoh sa ki nongbud ha u Nailur

Mawkyrwat, ‘Nailar, 28: U Bah Sounder Strong Cajee uba bat mynta kum u President jong ka ‘Mawkyrwat Constituency Socio Economical & Political Awareness Committee’ (MCSEPAC) ha ka jingïalang kaba la long ha ka sngi Saitjaiñ u la pynïasoh ïalade bad ka Trinamool Congress (TMC) bad ban ïa khun ïa ka Elekshon shka Iingdorbar Thawaiñ ha u snem 2023 na Mawkyrwat Constituency na ka tiket jong ka TMC.
Katba ki nongbud ki la pynbna ba kin sa pynïasoh sha ka TMC ha ka 24 tarik, Nailur.
Ïa kane ka rai, la shim ha ka jingïalang paidbah bad kaba long ruh ka jingïalang ban pynskhem ïa ki nongkitkam ba thymmai jong ka (MCSEPAC) kata jong ka Women’s Wing bad ka Youth’s Wing.
Ki nongkitkam bahakhmat jong ka (MCSEPAC) Youth s Wing ki long u President samla Benjohnson Lyngdoh, Vice President u samla Brightstar Thyrniang, u samla Tailes Wanniang bad u samla Alosis Nonglait, General Secretary u samla Thomas Thyrniang. Katba ki nongkitkam jong ka Women Wing ki long ka President ka kong Lamsuk Marngar, Vice President ka kong Ailinda Tongwah bad General Secretary ka kong Jubilin Lyngdoh.
U Bah Sounder Strong Cajee haba kren ha ka jingïalang u la ong ba ka jingshim rai ïa kano kano ka jingïaleh kam shong eh ha ka rai jong u shimet hynrei ka donkam ruh ka jingïasngewthuh jingmut bad don ka jingïarai lang da baroh namar lada ha ka jingpynkhreh na ka bynta kane ka kam elekshon, tang ma u marwei ym poi haei haei ruh em.
“Ha ki por elekshon kin sa mih bun ki blei, namar dei ki politician hi kiba nang ban pynshit briew bad dei ma ki kiba sdang ban pynïapait pynïapra para briew”, u la ong bad bynrap, namar ha ka por ba ïalap elekshon kim ju kwah ïa ka jingjop jong kiwei hynrei ki ju pynroh beit tang ïa lade. Kumta u la kyntu na ka bynta ki paidbah jong ka dong ka thaiñ ba kim dei ban shah pynthame ha ka jingjied ïa ki nongmihkhmat ne jied ïa ki nongmihkhmat ki bym don nongrim bad kiba leit ha Assembly tang ban thiah, ki bym nang ban kren halor ki jingeh jong ki paidbah hynrei ki dei ban nang ban jied ïa uta u nongïalam u shlur u ba kren haba shit ba shai na ka bynta ki jingeh jong ki paidbah.”
Haba kren pat halor ka party, u Bah Sounder u la kren da kaba shai ba un sa mih ban ïakhun ha kane ka elekshon 2023 na Mawkyrwat Constituency na Trinamool Congress bad ïa kane ym dei tang ka rai jong u marwei hynrei ka dei lyngba ka jingshimrai jong ki paidbah.
U la pynshai ruh ba u ladep ban ïa kynduh ïa ki nongïalam jong ka TMC la ka long kiba dei jong ka Meghalaya ne wat kiba dei jong ka bor ba hakhlieh.
“Ïa ka tiket, ki nongïalam ba hakhmat jong ka party TMC ki la pynthikna beit ba un dei uwei na ki kyrtong”, ïathuh u Bah Cajee.
U Bah Sounder u la ong ba kum ki paidbah ki la rai ba un ïakhun na ka TMC, namarkata, ka jingjop ha ka jingïaleh kam dei tang jong u marwei hynrei ka dei ka jingjop jong u paidbah ha kaba naduh mynta ka sngi ki jingïaleh bad ki jingeh kiba bun ba kum ki nongbud kin sa ïa kynduh, hynrei kumba ki la rai ban kyrshan ïa u ki dei ban long ki nongbud kiba ïeng skhem ha ka la ka nongrim jong ka hok bad jingshisha.