Sei ka NPP da u Bah Teibor na Mawlai, u dei u nongai kam ia ki hajar ngut

Shillong, Lber 25 : Ki nongialam ba hakhmat eh jong ka National People’s Party (NPP) kynthup naduh u National President,Conrad K Sangma kumjuh u National Vice President, Bah Prestone Tynsong ha ka sngi Thohdieng ki la pynbna syndon ia u Bah Teibor Pathaw, MDC ka Mawlai kum u kyrtong ban aireng ha ka elekshon MLA kaban long ha u snem 2023.
Haba kren ha ka jingialang pdiang burom ia utei u MDC ka UDP sha ka NPP, u Conrad u la ong, “U Bah Teibor u dei ka nongmuna jong ka jylla uba la iakhun ia ka jingkyrduh kam kyrduh jam ki samla da kaba thaw lad da ki hajar tylli ki kam. Lada une u briew u ioh shuh shuh ka kabu kaba biang un nanglah ban iarap kham bha shuh shuh,” u la ong.
Da kaba pynbna syndon ia ka kyrteng jong u Bah Teibor kum u kyrtong ka NPP ha u 2023 na Mawlai, u Conrad u la ong ruh ba ki nongkyrshan ki dei ban buh hakhmat eh ba ka elekshon kam dei shuh sa shisnem hynrei ka dei sa tang 300 sngi.
“Wat pyrkhat ba la jop lypa namar da phi pyrkhat kumta phin sa khein sting noh. Hynrei lada phi pyrkhat ba phin shah rem kan rung ka mynsiem iakhun tyngeh haduh ban da jop,” kyntu shuh shuh u Conrad ia ki nongtrei jong ka party.
Ha kane ka sngi, u Conrad ba dei ruh u Myntri Rangbah ka jylla, u la ong ba shen ki paidbah kin sa iohi ia ki kam kiba kane ka sorkar kan pyndep kiba la sahteng la slem bha kiba la ktah jur ia ka jylla baroh kawei.
Na ka liang u Bah Prestone ba dei ruh u Symbud Myntri Rangbah u la ong ba u Bah Teibor u don shisha ka jabieng kaba proh bad kham kyrpang kaba la pynlong ia u ban lah ban aikam da ki hajar ngut ki samla kynthei bad shynrang. “Lada ym dei na u bun ki samla ban ym ioh kam. Dei na kane ka daw ba ngi shoh jingieid ia une u nongialam jong phi.”
Ha kajuh ka por u ong ruh ba mynta u Bah Teibor u donlang ha kajuh ka bor ryngkat bad ki ym shuh ban shu sdien ha khyrdop jong ka bos.
Na ka liang u Bah Sniawbhalang Dhar pat u la ong ba ki sngew tikna ba 100 persen kin jop lut baroh 7 tylli ki constituency ha u 2023. U ong ruh ba da ka jingdon ki kyrtong kum jong u Bah Teibor kan iarap ia ka party ban jop suk ha ka elekshon ban wan tang marwei hi.