Sei ka MSKA 8 ngut ki nongïalehkai ban aireng ha ka Juniors (Boys and Girls) National Kickboxing C’ship 2025

Shillong, Nailur 22: Ka Meghalaya State Kickboxing Association (MSKA), ka la sei ïa ka kynhun ki nongïalehkai kickboxing kaba don 8 ngut bad uwei u coach ban leit aireng sha ka lympung ïakhun jong ka ‘Juniors (Boys and Girls) National Kickboxing Championship 2025’, kaba la sdang naduh ka 22 tarik Nailur (hynne ka sngi Nyngkong) ha Gymnasium Hall kaba don ha Solan, Himachal Pradesh.
Kane ka lympung kan bteng san sngi lynter bad kan kut ha ka 26 tarik Nailur, bad la pynlong ïa ka da ka Amateur Kickboxing Association jong ka Himachal Pradesh hapoh ka jingpeit jong ka WAKO India Kickboxing Federation.
Kane ka championship kan long ka rynsan ïa ki nongïalehkai kickboxing jong ka jylla Meghalaya kiba don ha ka kyrdan jong ka ri bad ka jylla ban dang pynneh ïa ka kyrdan jong ki bad kumjuh ruh ban shah jied na ka bynta ka lympung World Championship, International Open Kickboxing Championship bad ka Asian Kickboxing Championship..
Ka MSKA ka la jied ïa kane ka kynhun katkum ki jingai jingmut jong ki synjuk distrik kiba ïasoh lang. U coach ban ïalam ïa ka kynhun u dei u Nathaniel P Kurkalang.
Ki kyrteng jong kine ki 8 ngut ki nongïalehkai kickboxing ki ban mihkhmat ïa ka Meghalaya ki long u Erick Kharsati (K1 -81kg), Shongkun D Khongwar (K1 -65kg), Rishanskhem Lipon (Low Kick -54kg), Emiliana Susngi (Low Kick -45kg), Barkis Nongkhlaw (K1 -46kg), Derick D Nongrum (K1 -54kg), Aedriel Gordon Ranee (K1 -45kg) bad Orickson Marbaniang (Low Kick -45kg).
Ha kajuh ka por, ka MSKA ka la pyntip ruh ba ka Daniella IW Mylliemngap bad ka Medariphylla L Nongbri ki la shah jied ban mihkhmat ïa ka ri India sha ka World Senior and Masters Kickboxing Championship 2025 ha Abu Dhabi, UAE, kaban long ha ka 21 tarik haduh ka 30 tarik u Naiwieng.