Shillong, Naitung 31: Ka Meghalaya Swimming Association [MSA] ha ka 31 tarik Naitung, 2025 (sngi Palei) ka la wan shakhmat ban pynbna ïa ka kynhun jong ki khynnah nong ïakopjngi ki ba la khreh ban mihkhmat ïa ka jylla sha ki artylli ki lympung ïakob jngi kiban sa long ha kine ki sngi kiban sa wan.
Ka MSA ka la pynbna ruh ïa ki kyrteng jong ki khynnah ki ban mihkhmat sha ka 41st Sub-Junior National Swimming Championship kaba la buh ba kan long ha ka 04 bad ka 05 tarik u Nailar, ban long ha sorbah Bengaluru, bad na ka liang jong ka MSA ka la lah ba kan sei madan ïa arngut ki khynnah ïakop jngi ba kynthup ïa u Keanan Chugim Nongrum Momin (11 snem) bad ka Anisha Phanbuh (11 snem). ïa kane ka kynhun yn ïalam da u Mark H. Nongrum kum u manager.
Katba na ka bynta ka 51st Junior National Swimming Championship ka ban sdang ha ka 03 haduh ka 07 tarik Nailar pat ha Ahamedabad, ka MSA ka la lah ba kan sei madan haduh 9 ngut ki nongïakop jngi kiba ka la bynta ha ki ar tylli ki Group (I bad II).
Ha ka Group-I ki nongïalehkai ki don san ngut, kine ki kynthup ïa u Elberz W. Kharbani (16 snem), u Shaun Maxwell Diengdoh (17 snem), u Wanshan Ia U Allya (16 snem), u Elhanan Kharwar Nongrum (14 snem) bad ka Emi I Rta Ksoo (14 snem).
Ha ka Group-II ki khynnah ban mihkhmat baroh kidei kiba dang 13 snem, bad kine ki kynthup ïa u Meiai Pynsan Lyngdoh Tron, u Mechwa Na I Nikhla Siangshai, u Synrang Batngen Marbaniang bad ka Verem Gedaliah Nongsiej.
ïa kane ka kynhun kaba don 9 ngut yn ïalam da u Bah Jonathan Dunnai kum u manager.
Kumta kum ka dak ka jingaimynsiem ïa ki khynnah shuwa ba kin mih na Shillong ban leit ïashim bynta ha kitei ki lympung na ka liang jong ka MSA ka la pynlong ïa ka jingïalang kaba kyrpang ha ka janmiet jong ka sngi Palei ha pung jngi ha Crinolone.
Ha kane ka jingïalang la ïoh ban pynsngew ïa ki kyntien kitbok ka kitrwiang na u Bah Kenneth Wahlang Vice President kumjuh ruh na u bah B. Lyngdoh Secretary. Nalor ki khynnah kiba la ïadon lang ha kane ka sngi ki kynthuo ïa u Bah Joe Marwein Technical Director, Bah Maxillian Lyngdoh Treasurer, ki dkhot nongkitkam jong ka synjuk lem bad ki kmie ki kpa jong ki khynnah.
