Sei ka kynhun SRT ïa ka met iap u nongbud trok ba ngam ha ka jingtwa ka surok NH Lumshnong

Khliehriat Jylliew 18: Ka kynhun iarap jong ka jylla, ka State Rescue Team, mynta ka sngi ka la lah ban sei ïa ka met iap jong u nongbud trok ,u (L) Bishujit Chakrabarty, 36 snem kyrta, uba la jah naduh ka 16 trik na ka daw ka jingtwa ka surok ha Lumshnong hajan Tool Gate Plaza, ha kaba ka trok kaba u bud ka la ngam ha ka jingtwa.
Ki khubor pulit ki iathuh ba ka kynhun SRT ka la lah ban sei ïa ka met mynta ka sngi ha ka por 12.30 myn sngi, bad ka shim por haduh shi kynta ban wan pynpoi ïa ka met sahlor surok bah, namar ka um ka la kit ïa ka met jong utei u nongbud trok ha ka jingjngai kaba haduh 200 mitar bad ha ka jingjylliew kaba 400 phut shapoh.
Ïa ka met iap jong utei u nongbud trok, ki pulit ki la rah noh sha ka jaka buh met iap ha Khliehriat CHC bad pyndep ïa ka post mortem bad ha kajuh ka por ki pulit ki la ai jingtip sha kiba ha iïng jong utei u lanot.
Kum ban shu phai dien, ha ka por ba ka trok kaba don u registration number AS 01 DD 4496 ka ngam shapoh ha ka jingtwa ka surok national highway ha Lumsnong kaba la jia myn ha ka 16 tarik mynta u bnai, u nong ñiah jong ka trok u la ïoh ban kynthih noh na ka trok katba utei u nongbud jong u pat ym shym la tip shuh shano u don dei haduh mynta ka sngi ba la lap pat ïa ka met iap jong u, u (L) Bishujit Chakrabarty u dei na ka shnong Teliamura Santinagar, Khowai, West Tripur.