Shillong, Risaw 22 : Ka jylla ka la sei sa uwei u rangïalehkai phutbol ban mihkhmat mynta ïa ka ri India ha ka thup U-17 kaban aireng ha ka jingïakhun knieh rung sha ka lympung AFC U-17 Asian Cup kaban long ha u snem 2025.
Une u samla u dei uba la tip kyrteng kum u Manbhakupar Malngiang, u ba la shah jied ban don lang bad ka kynhun ba 23ngut jong ka Ri.
Kane ka lympung ïalehkai kan long ha Thailand naduh ka 23 – 27tarik u Lber, 2025. Ka jingïakhun ba nyngkong jong ka India kan dei pyrshah ïa ka Brunei ha ka 23tarik.
Lyngba kane ka lympung kan plie lad ïa ki 16 tylli ki kynhun na ka dewbah Asia ban ïa knieh pat ban rung ha ka thup jong ki phra tylli ki ri na ka bynta ka lympung FIFA U17 World Cup kaba la pynkiew mynta sha ka 48 tylli ki Ri kaban long ha Qatar ha u snem ban wan.
Hapoh ka jingïalam jong u Ishfaq Ahmed kum u coach, ka kynhun kan aireng pat sa ïa ka Turkmenistan ha ka 25tarik bad ïa ka Thailand pat ha 27tarik Lber. ha ka Group D.
Ki 10 tylli ki kynhun ba khur ïa ka nam lahduh bad san tylli ki kynhun ba wan hakhmat eh ha ka kyrdan kaba ar kin ïoh ban ïasoh lang bad ka kynhun trai jaka, ka Saudi Arabia ha ka lympung AFC U-17 Asian Cup 2025.
Ki rangïalehkai jong ka Ri ki kynthup ïa u Aheibam Suraj Singh, Rohit, Nandan Roy kum ki rangap kol.
Nangta u Dheeraj, Goyary Kokrajhar, Ksh Eykhojit Singh, Sabir Ahamad, Sajin Balan, Sankalp Yadav kum ki rangap dien.
U Abdul Salha Sheergojri, Ahongshang-bam Samson, Kh Azlaan Shah, Levis Zangminlun, Mahmad Sami, u Manbhakupar Malngïang, Md Arbash, Ningthou-khongjam Rishi Singh, Vishal Yadav, Ngamgouhou Mate kum ki rangïalehkai pdeng. Katba u Bharat Lairenjam, Prem Hansdak, Hemneichung Lunkim kum ki nongïalehkai shakhmat.
