Nongpoh Nohprah, 07: Ka Umsning Block Congress Committee ha ka sngi Saitjaiñ kata ha ka 7 tarik Nohprah 2024 ka la pynlong da ka jingïalang paidbah ha Umsning Auditorium Hall, Umsning na ka bynta ban pynban paidbah syndon ïa ka ticket jong u kyrtong ban ïa khun na ka party Congress ha kane ka election MDC 2025 na Umsning Constituency.
Ha ka kane ka jingïalamng la shim bynta da ki hajar ki paid nongkyrshan bad ki nongïalam ka party Congress, kiba la ai ka jingkyrshan kaba pura ïa u Bah Rocky A. Marwein kum u kyrtong ka party Congress na Umsning Constituency.
U Bah S.W Rymbai kum u District Observer ka party Congress u la wan ban shim bynta bad ruh ban pynbna ïa ka kyrteng jong u Bah Rocky A. Marwein ba un long kum u kyrtong ba pura ka seng Congress na ka bynta ban ïa khun ha ka election MDC 2025 na Umsning Constituency. Kiwei kiwei kiba la ïa don lang ki kynthup ïa u President ka RBDCC u Bah M.G Kharshanlor bad kynthup kiwei ki nongïalam ba hakhamt ka party Congress.
U Bah Rocky A, Marwein ha kane ka sngi, u la pynpaw ïa ka jingkmen ba ka party Congress ka la tynrong ïa u kum u kyrtong ka party Congress ban ïa aireng ha kane ka election MDC 2025 na Umsning Constituency bad u la pynpaw ruh ba ka jingkyrshan ba radbah ki nongïalam, ki nongkyrshan ryngkat ki paidbah un sa poi sha ka jingjop ba don burom.
Ha kane ka sngi, naduh u Bah Rocky A. Marwein bad ruh kiwei ki nongïalam ki la pynpaw ba kin dang ïai trei shitom ban trei borbah na ka bynta ka jingjop ba don burom jong u kyrtong ka party Congress na Umsning bad ki khmih lynti ruh ba ki paidbah kin ai ka jingkyrshan kaba pura ïa ka party Congress kaba don ka jingkyrmen bad kaba dei ruh ka party kaba ju shakri kyrpang na ka bynta ki paidbah.
