Shillong, Risaw, 22: Ka Bharatiya Janata Party ha ka sngi Baar ka la pynbna ïa ka kyrteng jong u MDC jong ka Tura Constituency u Bernard N. Marak ban pynïakhun ïa ka elekshon shiteng samoi ha Gambegre Constituency ka ban sa long ha ka 13 tarik u Naiwieng, 2024.
Ha ka jingïakren bad ki lad pathai khubor, u nongïalam ka BJP u Bah AL Hek uba long ruh u Myntri ka Sorkar Jylla u la ïathuh ba ka High Command jong ka party ka la pyntip ïa ka jingshim rai ban pynïakhun ïa u Bernard N Marak na ka bynta ka elekshon shiteng samoi ha Gambegre. Tang u Marak uba la pan tiket ban ïakhun ïa kane ka elekshon.
“Namarkata, u Marak un sa leit thep kyrteng ha ka sngi Palei,” u la ong.
Haba kylli haduh katno ka BJP ka sngewskhem ban jop ïa ka elekshon ha Gambegre namarba ka dei ka Seat ba la bat bun bun snem da ka seng Congress, u Bah Hek u la ong, “ka elekshon ka dei beit ka elekshon. Kino kino u kyrtong, uba ïakhun ïa ka elekshon, un sngew skhem beit ban jop. Kata ka dei ka elekshon. Ngam kren tang shaphang ka BJP. Kino kino ki kyrtong, ki ïakhun beit da ka jingthmu ban jop hynrei man ban shu pynlut kai ïa ka por bad ka bor khlem jop.”
U la ong ba kam long kaba suk hynrei ka thong jong ka BJP ka long ban phaikhmat sha ka elekshon da ki kam pynroi.
“Namar ka jingduna ki kam pynroi ha Gambegre, ka BJP ruh ka kwah ban bsuh khlieh lang bad ban wanrah ïa ka roi ka par ha Gambegre bad ha kiwei kiwei ruh ki Constituency,” la ong u Myntri bad kam ruh ba ka BJP kam shym la theh song pynroi tang ha ka Jylla Meghalaya hynrei ha ka ri baroh kawei. Namarkata, ki kam pynroi ba la leh ka Sorkar NDA hapoh ka jingïalam jong u Myntri Rangbahduh u Narendra Modi ka dei kaba la ïaroh lut da baroh.”
Shuh shuh u la ïathuh ba bun na ki nongïalam hapoh ka ri bad ha ka jylla kin sa leit kiew rynsan ha ka elekshon shiteng samoi ban pan jingkyshan na ka bynta ki kyrtong ban pynthikna ïa ka jingjop.
Haba kylli shuh shuh u Bah Hek u la ong, “ym tang ka kurim u Myntri Rangbah. Kiwei ruh kin don. Kiwei ruh ki kyrtong kin ïakhun. Balei phi kren tang shaphang ka kurim jong u Myntri Rangbah. Kumno ngin leit wad jingtip ïa kiwei ki seng saiñpyrthei haba ngi wad jingtip beit tang ïa u kyrtong ba la pynieng hi da ka party lajong.”
Halor ka jingkynnoh jong ka TMC ba ka NPP ka la pynkheiñ ïa ka Model Code of Conduct da kaba sam tin sop ing sha ki nongthep vote ka Constituency, u Bah Hek u la ong, “kane kam jia tang mynta ha kane ka Constituency. Ha baroh ki elekshon, kum kine ki jingkynnoh ki don beit. Kumno phin shu kynnoh haba khlem pat lah ban pynshisha.”
