SHILLONG, Rymphang 06: Ka All Meghalaya Kickboxing Association (AMKA) ha ka 06 tarik Rymphang, 2026 (sngi Thohdieng), ka la pynbna ba ka la jied ïa san ngut ki nongïalehkai ban mihkhmat ïa ka jylla bad kumjuh ruh ïa ka ri India sha ka lympung ïakhun jong ka Asia Pacific Open International Kickboxing Championship 2026 ha Bali, Indonesia.
Kane ka Championship kan sdang naduh ka 24 haduh 28 tarik u Rymphang, bad yn pynlong ïa ka ha Kutabex Hotel, Bali, Indonesia.
Napdeng kine, lai ngut ki khynnah kynthei kin ïashim bynta ha ka kyrdan ïakhun jong ka Sub junior Semi contact, kiba kynthup ïa ka Amegrace Nongbsap (22 kg), ka Ozanica Nongbsap (30 kg) bad ka Banshailin Grace Masharing (45 kg); nangta ka Blaiona Kharmujai kan ïakhun ha ka Full Contact jong ka kyrdan Senior (47 kg), katba u Mewanpyndap Marpan un ïashim bynta ha ka Junior Full contact (58 kg).
Ka jingïakhun kan long katkum ka kyrdan jingkhia jong ki nongïalehkai, ha kaba ki nongïa shim bynta kin hap ban ïaid lyngba shuwa ïa ka jingthew lane ka Weigh-in, kaba la buh ban long ha ka 24 tarik Rymphang ban pynbud sa ka Medical Check Up ban pynthikna ba ki long kiba bit ban ïashim bynta.
Haba ai jingkren sha ki lad pathai khubor, na ka liang jong u bah Samuel Hashah – President jong ka AMKA, u la pynpaw ïa ka jingsngewkmen ban ïoh ïa ka lad ban shim bynta ha kane ka Championship ha Indonesia, da kaba kdew ba kane kan ai mynsiem ïa ki khynnah samla jong ka jylla bad ha kajuh ka por kan long ka jinghikai na ka bynta jong ki ha kaba kin ïoh ïa ka lad ban ïa aireng bad kiwei pat ki nongïalehkai jong ki ri bapher bapher jong ka dewbah Asia.
Ka jingjied ïa kine ki san ngut ka dei lyngba ka jinglah jong ki ban pynpaw ïa ka sap ha ka 4th North East Kickboxing 2026 kaba la long dang shen ha nongbah Shillong, ha kaba baroh san ngut ki la ïoh ban khur ïa ka takma ksiar.
U bah Samuel u la ïathuh ruh ba kum u coach, u la ïoh ban pynlong ïa ki prokram kilanmet ban pyntbit bad pynkhreh ïa kine ki khynnah, bad ki khynnah kin dang bteng ïa ka prokram pynkhreh kumba ar taïew hashwa ban leit ïa shim bynta sha kane ka championship.
Ka Asia Pacific Open Championships kadei kawei na ki lympung ïalehkai Combat Sports kaba pawnam, kaba kynthup ïa ka Kickboxing, Boxing, Muay Thai bad ka MMA. Kane ka lympung kan wanrah lang ïa ki nongïalehkai ba pawnam na kylleng ka dewbah Asia bad la shim ba ka dei ka lympung kaba kongsan na ka bynta ki nongïalehkai Kickboxing ha Asia.
