Sei ka AITC da ka Dr. Saralin ban ïakhun ïa ka Election 2023 na Mawhati

Nongpoh, Naitung 23: Shuwa ba ki paidbah kin kynjoh biang sha ka samoi ban pynthymmai ïa ki nongmihkhmat na ki Constituency bapher bapher hapoh ka jylla na ka bynta ka election 2023 hapoh ka jylla, ki heh nongïalam ka Trinamul Congress mynta ka sngi ki la hiar sha Mawhati na ka bynta ban pynbna ïa ka kyrtong bad kumjuh ruh ban pynskhem ïa ki nongïalam ba pura ka Mawhati Block Committee.
Haba hiar sha ka Mawhati Constituency la ïalam hi da u president ba rangbah ka TMC party, u Dr. Mukul Sangma bad la sakhi lang ruh da ka jingdon lang u Vice President, u Bah George B. Lyngdoh, uba dei ruh u MLA ka Umroi, u Bah James Lyngdoh, Vice president, u Dr. Fabian Lyngdoh, General Secretary bad kynthup ruh kiwei kiwei ki nongïalam ka TMC na ka Ri Bhoi bad na ka jylla.
Ka jingïalangbah jong ka party la pynlong ha ka Shnong Umlaper, ha kaba ha kane ka sngi na ka liang u President ba rangbah ka TMC, u Dr. Mukul Sangma, lyngba ka TMC Party u la pynbna ïa ka Dr. Saralin Dorphang kum ka kyrtong ban aireng ha kane ka election 2023 na Mawhati bad ha kane kajuh ka sngi la pynskhem ruh ïa ka kum ka President ka TMC Party na ka Mawhati Block Committee ryngkat kiwei kiwei ki nongïalam ka party hapoh ka Mawhati Constituency.
Kum ban pynpaw, ka Dr. Saralin Dorphang, ka dei ka Doctor kaba la shakri ruh ïa ki paidbah ha Mawhati Constituency kum ka Medical Officer bad ka dei ruh ka khun balai jong u Bah P.W Muktieh, uba dei u MLA bad MDC barim ka Mawhati bad uba la bat teng ruh ïa ka kyndan myntri hapoh ka sorkar Meghalaya ha ka por ka jingsynshar ka Party Congress.
U Dr Mukul Sangma haba kren ha katei ka sngi u la pynshai halor ka nongrim jong ka party TMC kaba don ruh ïaka shap ka dur u phlang ban pynsïasyriem ïaki paidbah kiba long kum ki phlang kiba skhem u thied watla ki shah iuh shah kyrdem pynban ki khie lung bad phuh syntiew haba lah dei ka aiom
U Dr mukul sangma u la ther ruh ïaka jinglong jingman haka synshar khaddar bad ka sain hima sima haka jylla ha kine ki 4 snem ba synshar ka sorkar NPP kiba long khongpong ïa ka ei kaba ka sorkar ka leh haka por ba u long kum u myntri rangbah.
“Ngi ïohi ba ki heh spah ba la jied da ki paidbah ka Mawhati ki thied da ki kali rem dor, hato ki nud ban wan rah da kato ka kali sha kane ka thaiñ” ong u Dr. Mukul Sangma bad bynrap ruh ba ki paidbah ka Mawhati ki dei ban khot kyrpang ïaki ban wanrah da kato ka kali sha katei ka thaiñ khang ba un sngewthuh haduh katno ki paidbah kin jynjar ha ka leit ka wan na ka jingsniew palat ka surok” u la bynrap.
Shuh shuh, u la ong ruh ba ki Nongmihkhmat mynta kim dei shuh kita ki nongthaw aiñ bad ki la dei kita ki nongmihkhmat ban wan khaïi bad ban kamai spah tang na ka bynta ka jingmyntoi shimet bad khlem da pyrkhat pat ïa ka eh ka shon ki paidbah ba kum ki paidbah ha kane ka kynti ki la dei ban sngewthuh bad shuwa ban jied ïa ki nongmihkhmat ruh ki dei ban da bishar sani khnang ba kin nym babe hadie ba la jied ïa kita ki nongmihkhmat kiba dei kita ki nongthaw aiñ bad kiba peit shisha na ka bynta ka eh ka shon jong ki paidbah, u la bynrap.