Second Division FL 2025: Rung final ka Mylliem Lum naba pynliem ïa ka Mawryngkneng; jop ka Umphrup

Shillong, Nailur 22: Ka Mylliem Lum ka la pynliem noh ïa ka Mawryngkneng da 5-1 kol ha ka jingïakhun ïa ka Semi Final kaba nyngkong jong ka lympung Second Division Football League 2025 ba la pynlong da ka Shillong Sports Association ha madan First Ground-SSA Stadium, Polo hynne ka sngi Nyngkong.
Kane ka jingjop ym tang ba ka la buh jaka ïa ka Mylliem Lum ha ka jingïakhun final hynrei ka la pynthikna ruh ba kane ka kynhun kan kiew kyrdan sha ka First Division ha u snem ban wan.
Kiba la pynkhihjar na ka bynta ka Mylliem Lum ki long u Arbun Warjri (4’), Aliastar Nongsiej (6 & 84’), Fairly Nongkhlaw (76’), Saitborlang Kharkrang (87’); katba ka shi kol jong ka Mawryngkneng la thep da u Ialam Pyngrope (71’).
Lah ban ong ba ka jingïalehkai ka la long kaba noh shiliang ha kaba ka Mylliem Lum ka la ïoh ban pynskhem ïa ka jingkyrmen da kaba thep ar tylli ki kol hapoh ki 6 minit ba la sdang ïa ka jingïalehkai lyngba u Arbun bad u Aliastar ban lamkhmat ïa ka kylla step da 2-0 kol.
Ka Mawryngkneng ka la ïoh ban pynphai kawei ha ka minit kaba 71 lyngba u Ialam Pyngrope, hynrei kane ka la nang aibor pynban ïa ka Mylliem Lum, kaba la pynbud sa lai tylli ki kol ha ka kylla miet ban pynthikna ïa ka jingjop.
Shuwa kane, ka jingïakhun ban lait shah pynhiar kyrdan na ka Second Division jong ka Umphrup SC pyrshah ïa ka Umphyrnai SC ka la kut ha kaba ka Umphrup ka la wanphai nadien ban jop da 2-1 kol.
Ha ka jingïakhun dei ka Umphyrnai kaba la pynkhihjar nyngkong lyngba u Shemjingmut Kharmyndai (14′) hynrei ka Umphrup ka la pynïakhaid noh lyngba u Winjester Nongbri (37′) shuwa ba u Damanglang Kharbangar (65′) un thep ïa ka kol pynjop.
Ha kane ka sngi Ba-ar ka Mawpat SC bad ka Laitkyrhong SC kin ïakhun pyrshah ha ka Semifinal kaba ar ha ka por 4 baje janmiet. Ka Mawpat ka la wan ba-ar ha ka Group A bad ka la lah ban pynliem ïa ka Smit lyngba ka penalty ha ka Quarter Final. Katba ka Laitkyrhong ka la wan hakhmat duh ha ka Group B bad ka la pynliem ïa ka Tynring ha ka Quarter final.