Sdang wan poi biang ki sim Kbeit Amur Falcon ha Umru bad Tyrso ha Ri-Bhoi

Nongpoh, Risaw 23: Kumba ju long man la u snem naduh ki taiew ba ar jong u bnai Risaw ki sim kbeit kiba ju wan buhai shnong shipor bad shisien shisnem haka thaiñ Umru bad Tyrso bala tip kum ki sim Amur Falcon kila sdang ban wan poi biang ha katei ka jaka bad la khmih lynti ruh ba kitei ki sim kin wan poi bun naduh ka 15 tarik Risaw shaneng ban wan shongthaid tang kumba 1 bnai eiei ban leit pat sha ka jylla Nagaland.
Lah ruh ban ong ba ka jingwan buhai shnong kitei ki sim kbeit shisien shisnem ha katei ka thaiñ kala pynlong ruh ïa katei ka jaka kum kawei naki jaka jngohkai pyrthei, ban kyntiew ïaka ioh ka kot ki paidbah, watla katei ka thaiñ ka dang donkam shibun ki kam pynroi ban khring ïaki nongwan jngohkai pyrthei na kylleng ki jaka bad wat nabar jylla.
Haba ioh ban ïakren bad u Bah Alos Nongpoh General Secretary ka Tyrso Valley Wildlife Protection Society (TVWPS) u la ong ba kum kawei naki kynhun kaba ju ïada kyrpang ïa baroh ki jait jingthaw ba im haka mei mariang bad khamtam kitei ki jait sim phylla kiba ju wan tang shipor ha katei ka shnong ka pdiang sngewbha ïaki nongjngohkai pyrthei kiba ju ïeid ïaka mei mariang bad ki jingthaw ba im khamtam ban sakhi ïa kitei ki jait im ba kin wan ban peitkai sha katei ka jaka.
U Bah Alos u la maham ruh ïaki paidbah kiba leit peitkai ba kim dei ban pynthud lane pyniap ïa kitei ki jait sim, bad naka bynta ban ïada ïa kitei ki sim ka seng ka ïatreilang ruh bad ka Wildlife bad kumjuh ruh ka tnad Forest bad lada lap ïaki nongpynthud lane kiba pynïap ïa kitei ki sim kin ngat haka jingpynshitom kaba tyngeh katkum ki kyndon aiñ.
Shuh shuh u la pyntip ruh ba kum ka kynhun kaba ju ïaid ïa kitei ki jait sim mynta u snem kan sa pynlong da ka tamasa Amur Falcon Festival haki thaiñ Umroi ban pynpaw pyrthei ïakitei ki jait sim bad khamtam ban khring ïaki nongwan jngohkai pyrthei.