Jowai, Jymmang 06: U MLA ka 2-Jowai Constituency ma Wailadmiki Shylla mynta ka sngi ula plie ïa ka prokram ai jinghikai ne ka (Training Programme) kaba 45 sngi bad ïa kane la pynkhreh kyrpang da u MLA na ka bynta ki samla ba kin tip kumno ban ïeng hala ki jong ki kjat ban seng ïa ki kam la jong.
Ïa kane ka prokram ai jinghikai ban seng kam seng jam la plie mynta ka sngi ha ka jingïalang ba la pynlong ha Thomas Jones Synod College Jowai, ha ka jingdonlang u Principal jong ka College u Dr. D.G. Lyngdoh, u Deputy Commissioner ka West Jaiñtia Hills ma Garod L.S.N. Dykes, IAS, ma P. Toi DIC Manager, u Chairman ba thymmai ka Jowai Municipal Board ma Lasooki Lakiang, u CEO ka ‘Jowai Co-operative Urban Ltd’. Jowai ma A.N. Muksor, ki MDC ka NPP bad kiwei de.
Napdeng ki saw hajar ngut kiba ïakhun ban ïoh jinghikai ha kane ka prokram la jied tang 60 ngut kiba ïoh ban shah hikai’, na ka liang u MLA ula kloi ban ai jingïarap haduh 2 lak tyngka na ka pla la jong ïa U/Ka ba wan shakhmat eh ha kane ka prokram ai jinghikai sengkam khnang ba U/Ka kin ïoh ban sdang ïa ka kam jong ki.
U ma Wailadmiki ha ka jingkren ha kane ka sngi ula ong mynta dei ka pyrthei kyrduh kam kyrduh jam kumta la donkam ban pynleit jingmut ban wad ki lad ki lynti kumno ban seng noh ïa ki kam la jong, ym ban shañiah tang ha ka kam sorkar.
Ula ong hapoh ka jylla kiba riewspah hi ki dei ki briew ‘Businessman’ da kaba u ai nuksa ïa ki katto katne kiba la paw bha ha ka kamai kum u ma Nehlang Lyngdoh bad u ma Ngaitlang Dhar ha kaba ka kam jong ki mynta la lah ban ai jingtrei pat ïa kiwei de, da kaba ong ruh wat la ki long kiba duna ha ka pule ka puthi hynrei da ka jingtrei shitom haka kam kila lah ban poi sha ka thong.
U ma MLA ula pynsngew ruh shaphang ki lad jingïarap kiba lah ban ïoh lyngba ka Prime Minister Employment Generation Programme (PMEGP) kaba long haduh 25 lak tyngka ha ryngkat ka subsidy kaba 35% wat na ka liang ka ophis jong ka District Commerce & Industries Centre, West Jaiñtia Hills Jowai ka kloi ban ïarap ïa kane.
U kyrmen ba lynba kane ka prokram ai jinghikai kan long ka lad jingïarap kaba biang eh ïa ki samla ban kin ïeng ha la ki jong ki kjat bad kin long ruh ki nongai kam ïa kiwei ruh hadien ba ka kam jong ki ka long kaba ïaid shakhmat.
Ïa ka jingïalang ha kane ka sngi la pynïaid da u ma Eladmiki Suting (Programme Co-ordinator) katba ïa ki kyntien ai khublei la ïoh na u MDC ba shusieh (Nominated) ma Octomewot Lamin
La pynsngew ba kane ka jingai jinghikai ïa kitei ki samla ba shah jied 60 ngut kan sdang naduh mynta ka sngi naduh ka por 3 – 5 baje janmiet kata naduh ka sngi Monday haduh sngi Friday ha katei hi ka College.
