Nongpoh, Ïaiong 17: Hadien ka eriong kaba jur ryngkat u phria bad u slap, kala khyrwit haki bun tylli ki shnong ha Ri-Bhoi District dang shen kaba la wanrah ruh ka jingjulor kaba khraw ïaki iing ki sem, ki kali motor bad kumjuh ruh ki jingthung jingtep, ki lad jingïarap kila sdang ban tuid sha ki lanot kiba mad ïaka jingshah lyngshop haka eriong bad phria.
Naka liang u MLA bad MDC jong ka Umsning Constituency kila leit ban ai jingïarap kumba 24 ban ka tin sopiing, ka Khasi Student Union, Umsning Circle kala leit ban ai jingïarap kumba 10 ban ka tin sopiing sha ki lanot haka shnong Nongdewsaw kaba hap ha Umsning C&RD Block.
Kum ban pynkynmaw, ki khatsan tylli ki longiing ha ka shnong Nongdewsaw ki la shah ktah ha ka jingwan lynshop kyndit kynsan ka eriong ha ka miet jong ka 10 tarik Ïaiong, kaba hap ha ka Sngi U Blei bad kaba la pynjulor ha kiba bun tylli ki tnum iing bad ka jingkhyllem ki diengbah kiba la ban ïaka iing ka sem bad kumjuh ruh ka jingsahkut kali ha ki surok bah bad kumjuh ruh ka jingkhyllem ki post elektrik kaba la wanrah ia ka jingdum ha katei ka shnong kumba la pyntip da u Bah AB Warjri Rangbah Shnong.
Ha kaba ïadei bad ka jingjia haka 14 tarik Ïaiong ka EC jong ka Dorbar shnong Lumdaitkhla Bhoirymbong, U MDC ka Umroi Constituency lem bad ka Bhoirymbong C&RD Block lyngba u BDO Dr.CJK Warjri ki la noh synñiang jingïarap ïa ki lanot kiba lah shah lynshop ha ka eriong sha kumba 70 tylli ki longiing ha kaba naka liang u BDO u la pynpoi 3 quintal u khaw, u Bah R Kharbuki MDC u la nohsynñiang kumba 70 hajar tyngka ka pisa bad naka liang ka Dorbar Shnong Lumdaitkhla kumba 70 hajar.
