Nongpoh, Naiwieng 11: Sa tang da ki bnai ba ki paidbah ka jylla kin ioh biang ïa ka lad ban jied thymmai ïa ki nongmihkhmat sha ka ïing Dorbar thaw aiñ ka jylla bad haba phai sha ka jinglong jingman hapoh ka them Ri Bhoi ka lyer elekshon ka la sdang ban thnem bha ha kaba ki kyrtong ki la rung sha man la ki shong ki thaw ban pan ka jingkyrshan na ki paidbah katkum ka nongrim ba ki ieng ban ïakhun ïa kane ka elekshon.
Lah ban kdew hangne, ha Ri Bhoi District dang don bun ki kyrtong kiba ym pat lah ban pynbna paidbah na kaei ka party kin ïa khun ïa kane ka election lane kin ïa khun kum kita ki kyrtong shimet, hynrei haba phai pat sha ka jinglong jingman hapoh ka them Ri Bhoi la iohi bad sakhi ba kito ki kyrtong kiba thmu ban aireng ha kane ka election ki la sdang ban duh thiah duh dem bad ruh ban leit sha man la ki shnong ban pan ka jingkyrshan na ki paidbah.
Ka Ri Bhoi District ka don 5 tylli ki Constituency ba kynthup ïa ka Nongpoh kum ka Head Quarter ka Ri Bhoi District, ka Umnsing, ka Umroi, ka Mawhati bad ka Jirang Constituency bad haduh mynta pat ym pat ioh ïa ka jingtip ba thikna ba na kitei ki constituency katno ngut ki kyrtong kiba thmu ban aireng ha kane ka elekshon 2023 ban sa wan hapoh ka jylla.
Kumba la ioh lum jingtip ruh la don katto katne ki Party kiba la sdang ban pynbna ïa ka kyrteng jong ki kyrtong ki ban ai reng ha kane ka election, hynrei kiba bun hi na ki party kim pat lah ban pynbna paidbah ïa ki kyrtong bad wat la katta ruh ka jingleit pan jingkyrshan na ki paidbah sha ki shnong ki thaw ka la ïaid shaid shaid.
Kaei kaba la ioh lum jingtip bad wat lada ym pat lah ban pynthikna, ka dei ka jingioh jingtip ruh ba ki la don ki kyrtong kiba la sdang ban pyndonkam da ki bor jong ka pisa bad ïa kata kito kiba ioh pdiang ïa ka pisa ki shu ïathuh ba ki la ioh ruh haduh T. 5000 shi tnum ïing bad ki ïathuh satia pat mano uta u kyrtong ba la wan tyrwa da ka bor pisa tang ban ioh jingkyrshan na ki paidbah.
Kumba la paw ki dak ki shin ha kane ka kynti, ka elekshon ha Ri Bhoi kan dei kawei na ka elekshon kaba khluid bad ka ban sa thnem bha bad ka daw ka long ba naduh mynta ki kyrtong ne ki party kiba thmu ban ai reng ha kane ka elekshon ki la ïaid napoh napoh ban pan jingkyrshan na ki paidbah bad la don ruh ki kyrtong kiba la kular ïa ka bneng bad ka khyrdew nalor ba ki la sdang ruh ban pyndonkam da ka bor jong ka pisa tang ban ai jingkyrshan ki paidbah.
