Man u snem tang shu poi u bnai Jymmang ka ju don beit kata ka jingïakren kyrpang ban pyrshah ïa ka jingdih duma ne bam duma bad la ju ïohi ba ki khynnah skul ruh ki ju mih ban ïaid rally ryngkat bad ki nonghikai da kaba rah artad bad ki placard ban pyrta ba ka jingdih ne jingbam duma ka ktah ïa ka koit ka khiah bad wallam bun ki jait jingpang. Kane ka jingïaid rally ka ju don man u snem bad jan man ki skul ha ka jylla Meghalaya ruh ki ju pynlong ïa ka tangba imat kine kim ïarap ei ei khyndiat ruh hynrei ki shu kut ba ka jingïalap shabar ka kut shabar katba ha ki iing ki sem ka bteng beit kumba ju long man ka sngi na ka bynta kiba dih lane na bynta ki bym dih ruh.
Haduh mynta hi khamtam ha Meghalaya kam pher la kadei ha ki jaka sor lane ha ki nongkyndong lada kren ïa ka jingbam ne jingdih duma kadei ka mat kaba baroh kim sngew tynnad ban ïohsngew khamtam lei lei lada ong ba ka wallam bun ki jingpang. Lah ruh ban ong ba katno ngut eh ki kpa lane ki kñi kiban patiaw ïa ka jingïaid rally ki khun ki pyrsa haba ka jingkyrni ka la kylla thit. Kawei pat ka bynta lada ngam jylliew bha ka long ba ka jylla Meghalaya ka dang bun bha ki jingïakhun lada ka kwah shisha ban ïakhun pyrshah ïa ka jingdih bad jingbam duma. Kane ka hap ban sdang shwa na ki iing ki sem ha shwa ba kan treikam ha ka imlang sahlang ha ki shnong ki thaw bad ha ka thaiñ hi baroh kawei.
Ha kawei na ki jingjia, kata ha ka por ba i khun shynrang ba dang rit i dang bunkam ban thoh ïa ki dak ha ka placard ban leit rah sha skul na ka bynta ka rally pyrshah duma, i la kylli ïa u kpa, “Pa haduh katno u duma ba phi dih u ktah ïa phi?” Lada kum kane kajuh ka jingkylli ka mih na i khun jongphi, kaei ka jubab kaba ki kpa kin ai ïa ki khun. Hato u duma ba ki dih hadien ba la dep bamja lane ha ka por ba ki treikam ha iing u ktah neem ïa ki khun khamtam kito kiba dang lung.
Sngew dei ruh ban ong ba ki skul nalor ba ki pynlong ïa ki jingïaid rally ban pyrshah duma ki dei ruh ban khot ïa ki kmie ki kpa ban ai jinghikai lane ban syllok ïa ki halor ki jingma kiba utei u kynja jingbam jingdih u ktah ïa ki bad ruh ïa ki khun ki kti bad ïa baroh kiba ïa tan pateng ïa ka tdem kaba mih na u. Na ka por sha ka por la ju ïohsngew ba wat ka tdem kaba mih na ki nongdih ka ktah ïa kiba ring kumta lada pynshai ïa kito ki snar dih duma la dei ban ong ba ki dei ban sngewthuh bad pyrkhat bun bun sien ïa ki khun ba kam pat biang ban ong ba ieid ïa ki khun da kaba pyndap pynbiang ïa ka bam ka dih ka kup ka sem lane buh skul hynrei ruh ban peit ba ka jingim jong ki ha ka dih ka bam kam dei ban ïa bit ne ktah ïa ki khun ne ïa ka kurim kaba don ha syndah man ka sngi.
Ha kane ka juk mynta imat bun kim salia than shuh ïa ka jingkoit jingkhiah nalor ba ki jingbam kim long kiba paka shuh, pynban ki briew ki dang bam ïa kiwei pat ki jingbam kiba sniew kum kaba dih duma bad bam ïa ki khaini, bad kiwei. Man ka por ba ki leit ban shah sumar ne ïakynduh ïa ki doktor ba ju batai ba ka jingkyrni ka jingdih sikret ne duma bad ka jingbam duma ki long kiba sniew bad kiba ktah ïa ka koit ka khiah, hynrei kane kam shym la pynphikir satia ïa ki paidbah. Ka jingkoit jingkhiah ka don ha ka kti jong u briew shimet shimet ban phikir ïa la ka jong ka jingim, palat nangta ka shong ha ka bor jong ka mariang.
Ha ka por jong ka jinglong samla ha ba ka bor met ka dang biang bad ba ka bor jong ka jingïaleh pyrshah ïa ka jingpang ka dang khlaiñ, kam da don jingktah than eh ïa ka koit ka khiah, hynrei wat la katta ruh bun ki samla ki ud bad ki mad shibun ki jait jingpang. Na ka bynta kito kiba dei ban kiar ïa ki jingbam kiba ktah ïa ka met jong ki, ka jingbam kam ïapher satia na ka kyiad bad na u drok namar ba ka pyntroin ïa ka met jong ki.Tang kawei ka buit kaba rieh ba kito kiba ngat ha kitei ki jait jingpang ka long ba kin sngewthuh shai kdar ïa ka jingmut jong ka jingim bad ka jingbam. Haba kum bam ïa ka jingbam kaba ktah ka jingbang ka neh tang da ki minit bad ka jngbabe ka tied man la ka khyllip mat bad ka jingkoit jingkhiah ka nanghiar nanghiar.
Kumta kawei ka nuksa ka long, kumba ka bam kaba bang ka pynkmen ïa ka mynsiem ka jingkoit jingkhiah ka kham pynkmen da ka spah shah. Ïa ka jingkoit jingkhiah lah ban lehkmen bad sngew shilynter jingim katba dang ring mynsiem hynrei ka jingbam bakla ka dap tang ka jingbabe. Namar kata donkam ban nang ban bam bad lehkmen ha ka jingkhiah krat.
