Shillong, Ïaïong 05: Ka National Health Mission(NHM) ha Meghalaya ka la sdang ban lum jingkheiñ kaba kham bha halor ka jingdon ki nongtrei ïa kiba la tip kum ki Delivery Staff hapoh ka NHM.
Katkum ka kyrwoh ba la pyllait mynta ka sngi, la ong ba kumba long mynta ki don ki nongtrei kiba kum kine kiba ka kyrdan kaba pass bad ka por ba ki trei ka long kumjuh, hynrei ka tulop ba ki ïoh pat ka ïapher hapdeng jong ki.
Lyngba kane ka jinglum jingkheiñ kaba biang, ka NHM, ka ong ba ka kwah ban buh ryntih ïa baroh ki nongtrei ha ki khatsan tylli ki kyrdan katkum ka jingsiew ïa ki. Lyngba kane kan don ka jingpynkiew tulop da ka Increment kaba 5% man la ka snem. Ka kyrwoh ka ong ba ïa kane ka jinglum jingkheiñ yn pyndep haduh ka 22 tarik u Jylliew mynta ka snem. Lyngba kane ka NHM ka ong ba la ïoh kumba 543 tylli ki jubab haduh ka 4 tarik u ïaïong 2022 bad ïa kine la peit bniah na ka liang ka ophis.
Hapoh ka Service Delivery ki don haduh 1984 ngut ki nongtrei bad hadien ba la ïom lum bha ïa ki jingkheiñ yn sa shimti da ka Governing Body bad ka State Health Society na ka bynta ka jingmynjur.
