Nongstoiñ, Jylliew 6: Ka jingangnud jong ki paidbah ka West Khasi Hills khamtam eh na ka thaiñ Rambrai, ban don ïa ka surok kaba bha ka la jan urlong bad satang kumba katto katne snem, ki paitbah ka thaiñ kin lait na ka jingeh ha ka leit ka wan, ka kit ka bah, namar ka jingpyntrei ïa katei ka surok ka la sdang shait shait naduh u bnai Jymmang ba la dep.
Ha kaba ïadei bad ka jingpyntrei ïa katei ka surok, la ïoh jingtip ba ka jingsdang ban pyntrei ha kane ka kynti, ka dei tang na ka bynta ka wat kaba nyngkong (phase 1). Kata ka sdang na Nongstoiñ haduh Mawdumdum ha ka jingjngai kaba tang laiphew hynñiew kilomitar. Katba na ka bynta ka laiphew lai kilomitar, kata naduh Mawdumdum haduh Kyrshai, yn sa pyntrei pat kham hadien ynda ka jingsorjamin bad ka jingthew jingwoh ïa ki jaka ba katei ka surok ka dei ban ïaid lyngba, la lah ban pynbit pynbiang ha ka rukom kaba dei.
La ong ruh ba ka jingpyntrei ïa katei ka surok tang haduh Mawdumdum, ka dei namar ba ka laiñ ba la sorbe mynshuwa kam biang satia. Kumta la hap ban pynkylla ïa ka laiñ na sha kawei pat ka liang bad ba katei ka surok kan ïoh ban ïaid lyngba ïa ka shnong Umbah, Darephang, Nongspung haduh Kyrshai.
Ha kaba ïadei bad ka jingpyntrei ïa katei ka surok, na ka liang ki paitbah ka thaiñ Rambrai ki la pynpaw ïa ka jingsngew kmen, namar ba naduh ba katei ka surok ka la sniew ka leit ka wan, ka kit ka bah ka la thud haduh katta katta bad ka bai shong kali na Rambrai shaduh Nongstoiñ kaba jngai tang ar phew kilomitar, ka la ïa ryngkat bad ka bai shong kali na Nongstoiñ sha Shillong kaba jngai 85 kilomitar.
Nalor kata ki la ong ruh ba ka jingkiew dor jong ki mar ki mata ha ïew Rambrai ruh, ka dei namar ba ki kali kiba kit mar ki la hap ban shim tam ïa ka bai kit namar ka jingsniew palat ka surok. Kiwei pat ki nongshong shnong na ki thaiñ rimen naduh ka shnong Sohmynthar, Mawthir, Mawdumdum, Kyllang bad kiwei kiwei ki shnong, kiba katei ka surok ka ïaid lyngba, ki la ong ba lada ïa katei ka surok ka la dep ban pyntrei haduh Kyrshai, kan long ka jingkyrkhu kaba khraw ïa ki paitbah nongshong shnong, namar baroh ki paitbah ki im da ka rep ka riang bad ki jaka ruh ki dei kiba seisoh bha ha kaba ki soh ki pai bad kiba bun ki mar rep ki mih bha.
Ha kajuh ka por ki la ong ba lada katei ka surok ka la poi haduh Kyrshai, ki nongdie jingdie ki la suk shibun ban leit thied mar naduh Guwahati, namar ka la jan bha bad ka ïew khappud bad ka Assam ka la don ha Ukiam. Ki la ong ruh ba wat la ka jingsdang ban pyntrei ka la dei ha ka aïom slap bad ka surok ka la ktieh bha, hynrei ki la kyrpad ïa ki paitbah nongleit nongwan ba kin ïaishah shipor haduh ban da dep ïa ka surok kaba bha.
