Nongstoiñ, Naitung, 23: Watla ki bor ka sorkar lyngba ka tnad pulit ki la trei shitom bad ïakhun tyngeh ban rat diengkhong ïa ki nongkhaïi drok kiba la pynshong syier ym tang ka imlang sahlang, hynrei haduh mynta ki nongkhaïi ki dang ïohlad ban pynngop ïa ki khynnah bad ki samla ha utei u jingdih pynbuaid.
Dang ha kane ka sngi saitjaiñ la ïoh ban ïakren bad bah S.Myrthong uwei u rangbah na kawei ka shnong ha ki thaiñ Rambrai, ha kaba u la pynpaw ïa ka jingsngew bynñiaw ba utei u jingdih pynbuaid u la sdang ban ïoh rung ha katei ka thaiñ, kaba la buh ïa ki longkmiie long kpa ha ka jingsngew buhkhoh, namar ka jingsheptieng ïoh ba ki khun ki kti jong ki kin ngat ha ka jingshah pynngop ha ki riew shim kabu.
U bah Myrthong u la ong ruh ba ka dei ka sien ba ha katei ka sngi saitjaiñ ka dei ka sien kaba nyngkong eh ba ki nongshong shnong kin lap ba ki la sdang don ki samla kiba pyndonkam ïa utei u jingdih pynbuaid. Haba ki la lap ki riew rangbah ki la pynlong ïa ka jingïakynduh ba kyrkieh ha kaba ki la khot lang ruh ïa ki katto katne ki samla kiba la sdang ban pyndonkam ïa u drok na ka bynta ban tohkit na ei ki ïoh.
U la ong ruh ba hadien ka jingtohkit kaba bniah bha, kitei ki samla ki la ïathuh ba ki don ki briew kiba la wan rah bad ha kaba nyngkong ki leh jan bha na ka bynta ban pynlong paralok. Hadien kata ki ai ha ki ba kin pyrshang ban dih khlem da siew dor. Nalor kata ki la phla ruh ba hadien ba ki la ai ei arsien lai sien ban dih ka la don ka jingkwah, hynrei kitei ki paralok kim ai ei shuh bad ki hap ban siew da ka pisa.
U bah Myrthong u la ong ruh ba namar ka dei ka sien ba nyngkong ki rangbah ki la ong ba kim pat kwah satia ban ïathuh ïa ki kyrteng jong kitei ki samla bad ïa ki lad ba ki nongkhaïi drok ki pynpoi. Namar ba ki dang pynap shrip ban tip bniah ïa ka por ba ki ïa leit ïa wan bad kynda ki la tip bad pynthikna ïa ka leit ka wan ka jong ki, kin sa pyntip sha ki bor pulit ba kin pynap shrip ban kem ïa ki, namar ki rangbah jong ka thaiñ kim kwah ba utei u jait jingdih pynbuaid un kynrei ha katei ka thaiñ.
Ha kajuh ka por u la ong ruh ba ka por ka la dei ïa ki rangbah shnong, ki sengbhalang, ki samla shnong, ki senglongkmie bad ki paitbah ba kin shim ïa ka jingkitkhlieh ban ïaleh pyrshah bad ban rat diengkhong ïa utei u jait jingdih da kaba kin don ka jingïatreialang kaba jan bha bad ki bor pulit namar lada khlem ka jingïatrei lang yn ym lah ban rat dyngkhong.
U la kyntu ruh ïa baroh ki longkmie longkpa ba kin peit ngor bha ïa ki khun jong ki khamtam ïa kiba dang hapoh arphew snem, namar ba ki dang long kiba ngeit biej bad kiba kwah ban ïalong paralok bad kiwei pat, hynrei lada ki bakla ban jied dei hangta ba ki shah pynngop ha ki kam sniew ba bun rukom.
