Sdang pynpaw ki paidbah ïa ki nongialam ba lah ban shimti kum u CM hadien ka elekshon 2023

Shillong, Jymmang 30: Ha kine ki sngi baladep, ka la don ka jingïatai ha ki rynsan jong ka Social Media shaphang u Nongïalam uba lah ban shimti kum u Myntri Rangbah hadien ka elekshon MLA 2023. Kiba bun hi ki rynsan ki pynpaw khamtam ïa u Nongïalam na kane ka thaiñ ba shong ki Khasi Pnar.
Ki la don ruh kiba la pynlong ki jingtwad jingmut na ki paidbah da kaba shu ïa vote ha ki Social Media. Ha kawei na kine ki jingïa pyni da kaba thep vote, kiba paw kyrteng ba ki la bit ban long Myntri Rangbah napdeng ki Khasi Pnar ki long u Bah Ardent Basaïawmoit, u Bah Vincent Pala, u Bah Metbah Lyngdoh, u Bah Prestone Tynsong bad HM Shangpliang. Napdeng kine, 62% ki la jied ïa u Bah Ardent, 18% ki la jied ïa u Bah Vincent Pala, 8% ki la jied ïa u Bah Prestone Tynsong, 7% ki la jied ïa u Bah Metbah Lyngdoh bad 5% ki la jied ïa u Bah HM Shangpliang. Kiba la ïashim bynta ki long kumba 2 hajar ngut.
Hadien ba kiba bun ki la ïohi ïa kane ka Poll, ki don katto katne ki riewpawkhmat ki bym da kwah ban pynpaw kyrteng ïa mynta ki la phone sha u nongthoh khubor ban pynpaw ba lada ki paidbah ki kwah ba u Bah Ardent un ialam ia ka jylla kum u Myntri Rangbah, kaba nyngkong ka long ba ki paidbah Nongkrem kin hap ban pynjop MLA ia u ha snem 2023.
Nangta kaba ar pat ka long ba kin hap ban pynjop bun ki MLA na ka Seng VPP, lym kumta ka jingjop tang jong u Bah Ardent bad katto katne ngut ki MLA na kane ka Seng kan nym poi sha ka thong jong ka jingangnud ki paidbah.
Ki don ruh katto katne, kiba la pynpaw ba u Bah Ardent udei u nongialam uba la biang, namar u la long MLA la ar term. Nangta ki la kdew ruh ba ha ka por ba u long u CEM ka KHADC ne u Khliehduh ka KHADC tang 6 bnai ruh, u la pynpaw ka jingtbit ka rukom treikam, ha kaba ha katei ka snem, kata ha u 2014, ka KHADC ka la paw bha ka jingtreikam, khamtam ha kaba ïadei bad ka Iewduh, kaba u da ioh jingkyrshan pura na ka liang ki Nongiew ruh.
“Baroh ngi kynmaw ba ka Iewduh ha ka por ba long CEM i Bah Ardent, katno ka khuid ka suba bad katno ki nongiew ki sngew trai ïa kane ka iew ba kyntang kumba ki ju ong”, la ong i Kong E. Blah, iwei na ki nongshong iew.
Nangta ki la kdew ruh ïa ka jinglah jong u ban leit beh sha ki shnong ki thaw kiba don hapdeng ka jingiakynad. Wat ia ka jingpynkynriah ia ka Them Metor na Them Iewmawlong ruh u la sdang pynkhih, hynrei u la shah pynkhyllem noh.
Lah ban kdew hangne ruh ba dei ha ka por ba long CEM u Bah Ardent, ba la pynkylla Law adong ïa ka Law Syiem jong ka Hima Mylliem ha Mawpat, ha ka por ba ka don ka jingthymu naka liang ki Myntri ban ïa bhah ïa kane ka khlaw kaba long ka jaka pynmih lyer khuid ia ka jongbah Shillong.
Kiba bun hi ki paidbah ba la ïoh ban iakren da ki katto katne ki nongthoh khubor, ki pynpaw ba ym don jingartatien ba u Bah Ardent u la lah ban shimti kum u Myntri Rangbah, hynrei kaba donkam ka long ban pynjop bun shuwa ki MLA na ka Seng VPP.